Ֆիլմ, որը նկարահանել են 21 կինեմատոգրաֆիստներ

Տանյա Պետրիկի «Կինոգնացք. ռուսական ձմեռ» վավերագրական ֆիլմը մասնակցում է «Ոսկե ծիրան» կինոփառատոնին: Այն առաջադրվել է «Միջազգային վավերագրական մրցույթ» անվանակարգում:

Լրագրողների հետ հանդիպման ժամանակ Պետրիկը նշեց, որ իր ֆիլմը յուրահատուկ է, քանի որ այն ավելի շուտ նման է նախագծի:

«Ֆիլմի նկարահանման աշխատանքներին մասնակցել է նկարահանման 6 խումբ` աշխարհի 14 երկրներից ժամանած ավելի քան 21 կինեմատոգրաֆիստներ: Ի սկզբանե գաղափարն այսպիսին էր` նկարահանել ֆիլմ ռուսների մասին, բայց, քանի որ մենք` տեղացիներս, շատ բան չենք նկատում, որոշեցինք, որ ավելի լավ է դա անեն օտարազգի կինեմատոգրաֆիստները»,- ասաց Պետրիկը:

Նա տեղեկացրեց նաև, որ կինեմատոգրաֆիստներին առաջարկել են անդրադառնալ տարբեր թեմաների` կանայք, ձմեռ, օղի, արջ: Պետրիկը խոստովանում է` դժվար էր տարբեր թեմաներով նկարահանված ֆիլմերը ամբողջացնել մեկ ընդհանուրի մեջ, քանի որ կինոռեժիսորներից յուրաքանչյուրն ունի իր ձեռագիրը:

«Պատկերացնո՞ւմ եք` ձմռանը, երբ արջերը խորը քուն են մտած, նկարահանող խումբը պետք է նրանց մասին ինչ-որ բան նկարահաներ, դրա համար նրանք յուրօրինակ լուծումներ են տվել: Ասենք` օղու թեմային անդրադառնալիս էլ ոչ թե խմիչքի վնասակար ազդեցության մասին էր խոսվում կամ քարոզվում, այլ նկարահանող խումբը գտել էր մի ռեժիսորի, ով հաճախ էր ալկոհոլ օգտագործում և նրան հարցեր էր տալիս`ինչո՞ւ է խմում, ի՞նչ է զգում, չի՞ կարող առանց օղու, այսինքն` մենք հարցեր էինք միայն բարձրացնում»,- ասաց Պետրիկը: