Վարչապետը պարտավոր է ամիսը գոնե մեկ անգամ ներկայանալ սահմանամերձ գյուղեր. Հովիկ Աբրահամյան

Այսօր վարչապետ Հովիկ Աբրահամյանն այցելեց Տավուշի մարզի Մովսես սահմանամերձ գյուղը:

Մովսեսի բնակիչները վարչապետին պատմեցին իրենց խնդիրների մասին, որոնցից առաջնահերթը սահմանին թշնամու կրակոցներն են:

Մովսեսցիներին անհանգստացնում է նաև այն, որ խորհրդային տարիների ընթացքում իրենց կուտակած ավանդները չեն ստանում և հնարավոր է` արդեն ողջ չլինեն, երբ իրենց հերթը հասնի: Հովիկ Աբրահամյանը վստահեցրեց, որ այժմ ավանդների վերադարձման գործընթաց է տեղի ունենում: «Կարվի ամեն բան, որ սահմանամերձ բնակավայրների բնակիչների ավանդներն ավելի արագ վերադարձվեն»,- ասաց Հովիկ Աբրահամյանը:

Նա նաև խոստացավ լուծել Մովսեսի ոռոգման և խմելու ջրագծի ցանցի վերանորոգման հարցը, աջակցել մովսեսցի այն ուսանողներին, ովքեր ունեն բարձր առաջադիմություն, սակայն զրկված են որևէ արտոնությունից:

Մովսեսի գյուղապետ Արարատ Ավալյանը Հովիկ Աբրահամյանին հայտնեց, որ սահմանամերձ գյուղը չունի կոմբայն: «Եթե կոմբայն լիներ, գյուղատնտեսական աշխատանքները բավականին կհեշտանային, հատկապես, որ շուտով բերքահավաքի ժամանակն է»,- ասաց գյուղապետը: Հովիկ Աբրահամյանը խոստացավ, որ Մովսեսը կունենա կոմբայն:

Մովսեսից հետո Հովիկ Աբրահամյանն այցելեց Վերին Կարմիրաղբյուր: Այստեղ նա հայտարարեց, որ կառավարությունն ամեն ինչ պետք է անի այս սահմանամերձ գյուղի համար: «Ես դեմ եմ, որ որևէ սահմանապահ գյուղ դատարկվի: Եթե այստեղ քիչ է դպրոցականների թիվը, ուրեմն մենք պետք է լրացուցիչ միջոցներ հատկացնենք ու դպրոցը պաշտպանենք»,- ասաց Հովիկ Աբրահամյանը:

Նրա խոսքով` կառավարությունը կփորձի իրականացնել ծրագրեր, որոնք արդյունքում աշխատատեղեր կբացվեն: «Այն ամենը, ինչ խոստացվել է, անպայման կիրականացվի»,- ասաց վարչապետը: Նա խոստովանեց, որ թեև աշխատանք կատարվում է, սակայն կառավարությունն անելիքներ դեռ շատ ունի: Աբրահամյանի խոսքով` նախարարները, մարզպետները և վարչապետը պարտավոր են ամիսը գոնե մեկ անգամ ներկայանալ սահմանամերձ գյուղեր:

«Այս գյուղերի մասին խոսելիս ես ասում եմ` սահմանապահ, որովհետև այստեղ ապրող մարդիկ, իրոք, սահմանապահ են: Եթե մարդը քնում է` մտածելով, որ գիշերը կարող են կրակել իր տան վրա, ուրեմն նա, իրոք, սահման է պահում»,- ասաց Հովիկ Աբրահամյանը: