98 միլիոն դրամ` Սյունիքի և Վայոց ձորի տարրական դասարանների աշակերտների ու մանկապարտեզների սաների սննդի համար

ՀՀ Սյունիքի և Վայոց ձորի մարզերում հանրակրթական դպրոցների տարրական դասարանների և նախակրթարանների աշակերտների համար սննդի կազմակերպման և ապահովման նպատակով կառավարությունը վաղվա նիստում որոշում կկայացնի Սյունիքի և Վայոց ձորի մարզպետարաններին 2014 թվականի երրորդ եռամսյակում հատկացնել 98 միլիոն 29.8 հազար դրամ:

Այդ գումարից 69 միլիոն 808 հազար դրամը կտրամադրվի Սյունիքի, 28 միլիոն 221.8 հազար դրամը` Վայոց ձորի մարզպետարաններին:

Ըստ կառավարության հիմնավորման` սույն որոշման նախագծի ընդունման արդյունքում հնարավորություն կստեղծվի Վայոց ձորի և Սյունիքի մարզերի հանրակրթական դպրոցների տարրական դասարանների աշակերտների համար սննդի կազմակերպման և ապահովման գործընթացը կազմակերպել պատշաճ մակարդակով` մինչև ուսումնական տարվա սկիզբը ապահովելով անհրաժեշտ ֆինանսավորումը: