Ռաքել Դինքի ուշացրած, բայց ոչ ուշացած նամակը՝ Հրանտ Դինքին

Հրանտ Դինքը սպանությունից ընդամենը մեկ շաբաթ առաջ կնոջ՝ Ռաքելի հետ թերթել էր անցյալի լուսանկարներն ու վերհիշել հայկական որբանոցում իրենց անցկացրած տարիները:

Լուսանկարների արանքում նրանք գտել էին Հրանտի՝ 2001 թվականի փետրվարի 14-ի նամակ-բանաստեղծությունը՝ ուղղված Ռաքելին, որն այդ ժամանակ հրապարակվել էր թուրքական «Hurriyet» թերթում: Բանաստեղծությունը վերնագրված էր` «Քեզ հասնելու համար ես թանկ եմ վճարել»:

Նրանք միասին վերընթերցել էին նամակը, ու Հրանտը «ըմբոստացել էր» Ռաքելի դեմ, թե ՝ «տե’ս, ես քեզ համար ինչեր եմ գրել, իսկ դու ինձ համար՝ ոչ»: «Իսկ ինչո՞ւ գրեմ նամակ, եթե միշտ իմ կողքին ես, և ես այդ ամենն ասել եմ քեզ՝ անձամբ »,- պատասխանել էր Ռաքելը:

Հրանտի մահից հետո Ռաքելը հազարավոր մարդկանց ներկայությամբ կարդաց իր՝ ուշացրած, բայց ոչ ուշացած նամակը՝ ամուսնուն:

Հրանտն իր բանաստեղծությունն սկսել էր «Ա~հ սիրելիս»-ով և ասել՝«Քեզ համար ես թանկ եմ վճարել»:

Ի պատասխան՝ Ռաքելը գրեց.

«Ա~խ սիրելիս, ես էլ քեզ համար եմ գրել սիրո նամակ,

Ես նույնպես թանկ վճարեցի, ի~մ սեր»:

Թարգմանությունը՝ Արազ Գայմագամյանի