Էլեկտրաէներգիայի սակագնի բարձրացման հարցը նախարարներին չի՞ հուզում

Այսօր կառավարության նիստից հետո ամենաարագը և առաջինը շենքից հեռացել է Հանրային ծառայությունները կարգավորող հանձնաժողովի նախագահ Ռոբերտ Նազարյանը, ով կառավարությանն ու ԱԺ-ին էր ներկայացրել  էլեկտրաէներգիայի սակագնի հերթական թանկացման մասին միջնորդությունը:

Հիշեցնենք, որ օրեր առաջ, երբ ՀՀ քաղաքացիները հավաքվել էին Սարյան փողոցում` Հանրային ծառայությունները կարգավորող հանձնաժողովի շենքի առջեւ` իրենց արդարացի բողոքն արտահայտելու էլեկտրաէներգիայի սակագնի բարձրացման դեմ, նրանց մոտ ոչ միայն հանձնաժողովից որևէ ներկայացուցիչ չիջավ, այլև բողոքի ակցիան ամենաբիրտ ձևով ճնշվեց ոստիկանության կողմից: Այնինչ` քաղաքացիներն ընդամենը ուզում են ստանալ իրենց հուզող հարցերի պատասխանները, հարցեր, որոնք ոչ միայն հիմնավոր պատասխաններ չունեն, այլեւ առաջադրում են նորանոր հարցեր:

Այսօր կառավարության շենքից դուրս եկած` Սփյուռքի և արտակարգ իրավիճակների նախարարները նույնպես խուսափեցին խոսել էլեկտրաէներգիայի սակագնի բարձրացման մասին: Նրանց էլ կարելի է հասկանալ՝ նախարարն ինչպե՞ս  հասականա, թե հոսանքի թանկացումն ինչպես է խփում ՀՀ սովորական քաղաքացու գրպանին: