Ալիևի՝ ԼՂ հարցում ուժային քաղաքականությունը չհավանողների շրջանում զտումներ են սկսվել. ԵԱՀԿ նախկին համանախագահ

Մայիսի 12-ին լրացավ Ռուսաստանի միջնորդությամբ Ղարաբաղում ձեռք բերված հրադադարի 20-րդ տարեդարձը. գրում է ԵԱՀԿ ՄԽ նախկին համանախագահ, դեսպան, ռուսաստանցի դիվանագետների ասոցիացիայի փոխնախագահ Վլադիմիր Կազիմիրովն իր՝ «Ղարաբաղյան հակամարտության նոր ճակատը» հոդվածում. հայտնում է Независимая газета-ն:

Հոդվածը մասնակի կրճատումներով՝ ստորև:

«Տարեթիվը տարբեր երկրներ են նշել, սակայն` տարբեր ձևերով: Անգամ`  ԵԱՀԿ Մինսկի խմբի անդամ չհանդիսացող Անգլիայում: Ամենից քիչ` Ադրբեջանում: Պատերազմում պարտված պաշտոնական Բաքուն հակված չէ գնահատել՝  քանի հազար արդբեջանցիների կյանք է փրկվել հրադադարի արդյունքում: 

Տարեդարձին ընդառաջ Բաքուն նոր ներքին ճակատ է բացել: Ողջ երկրով մեկ սկսել են զտել հայտնի գործիչների, որոնք 100%-ով հավանություն չեն տալիս իշխանությունների` ԼՂ հարցում  ուժային քաղաքականությանը և անգամ ուղիղ կապեր են հաստատում հայերի հետ:

Օրինակ`ադրբեջանցի վերլուծաբան և լրագրող Ռաուֆ Միրկադիրովի և «Խաղաղության եւ ժողովրդավարության ինստիտուտի» տնօրեն Լեյլա Յունուսի ու նրա ամուսնու` քաղաքագետ եւ պատմաբան Արիֆ Յունիսի նկատմամբ հետապնդումներ են իրականացվում: Ակնհայտ են Հարավային Կովկասում լուրջ հակամարտության կարգավորման կարևոր ուղիներից մեկը՝ «ժողովրդական դիվանագիտությունը», երկու հարևան ժողովուրդների միջև ուղիղ շփումները խեղդելու փորձերը:

Ոչ  պաշտոնական շփումների ընդլայնման արդյունքում կողմերի դիրքորոշման մեղմացումը,  հակամարտությունում փոխզիջումների որոնումը բնավ  Բաքվի շահերից չեն բխում: Ընդհակառակը` իր քաղաքականությամբ, որը հայտնի է որպես կացնային, և ոչ միայն Սաֆարովի «սխրանքի համար», Բաքուն ձգտում է կտրել այդ բոլոր կապերը:

Ժամանակը չէ՞ այժմ, որպեսզի հետո ուշ չլինի, ԵԽ նախարարների կոմիտեի նոր նախագահի առաջ Բրյուսելում բարձրացնել այս հարցերը, որոնք ուղղակիորեն վերաբերում են մարդու իրավունքներին»: