Դատական դեպարտամենտը ականջ չունի, որ լսի. ՄԻՊ

Այսօր ԱԺ-ում 2013թ. բյուջեի կատարողականը ներկայացնելիս ՀՀ մարդու իրավուքնների պաշտպան Կարեն Անդրեասյանը հայտարարել էր, որ շատ լավ կլիներ, եթե պետական մեկ-երկու մարմին, որ «ականջ չունեն, որ լսեն», փոխեին իրենց վարքագիծն ու դիրքորոշումը:

Լրագրողների հետ զրույցում պատասխանելով Yerkir.am-ի հարցին` որո՞նք են այդ մեկ-երկու պետական մարմինները, որ «ականջ չունեն, որ լսեն», Կարեն Անդրեասյանը խուսափեց նշել դրանք` ասելով, որ կհրապարակի խախտումների վիճակագրությունը, որից էլ պարզ կդառնա, թե որոնք են այդ պետական մարմինները: Դիտարկմանը, թե գուցե այդ մարմիններից մեկը դատական դեպարտամե՞նտն է, ՄԻՊ-ը պատասխանեց` այո, դատական դեպարտամենտը, որը շարունակում է տուրք գանձել:

«Եթե որևէ մեկը փորձի ժամանակ ծախսել և կարդալ, կտեսնի, որ ակնհայտ ճշմարտությանը փորձ է արվում երկար-բարակ պատասխան տալ, այսինքն` այնպես են անում, որ հոգնեք ու այլևս չկարդաք»,- ասաց Կարեն Անդրեասյանը:

Նրա կարծիքով` եթե պետական մարմինը ցանկանա, ապա ՄԻՊ-ի առաջին իսկ գրությունից հետո կարող է վերլուծել խախտման որոշումը, բայց երբ երկարացնում ու բարդացնում են գործընթացը, որից հետո շարունակում են համառել, որ խախտման գործընթաց չեն տեսնում, և երբ պետական մարմինը չի կարողանում տրամաբանել ու համոզել ՄԻՊ-ին, որ խախտում չկա, այդ դեպքում է, որ Կարեն Անդրեասյանն ասում է, որ ականջ պետք է ունենալ` լսելու համար: