Զինադադարը բավարար չէ, պետք է իսկական լուծում գտնել. Ֆրանսուա Օլանդ

Զինադադարը բավարար չէ, պետք է իսկական լուծում գտնել.  ՀՀ նախագահ Սերժ Սարգսյանի հետ համատեղ մամուլի ասուլիսի ժամանակ հայտարարեց Ֆրանսիայի նախագահ Ֆրանսուա Օլանդը:

Նա ընդգծեց, որ մինչ Հայաստան գալը Ադրբեջանում էր եւ այնտեղ եւս վերահաստատել է իր պատրաստակամությունը՝ ամեն ինչ անել` ԼՂ հակամարտությունը լուծելու համար:

Օլանդը հայտարարեց նաեւ, որ Ֆրանսիան լավ հարաբերություններ ունի Հարավային Կովկասի երեք երկրների հետ էլ եւ իր համերաշխությունն է հայտնում այդ պետություններին:

Նա անդրադարձավ նաեւ ՀՀ-ԵՄ հարաբերություններին, նշեց, որ Ֆրանսիան կաջակցի ՀՀ-ին ԵՄ-ի հետ հարաբերությունների կարգավորման հարցում:

Խոսելով ՀՀ-ի՝ ՄՄ-ին միանալու որոշման մասին` Օլանդը վստահեցրեց, որ Հայաստանին դատապարտելու խնդիր Ֆրանսիան իր առջեւ չի դրել: «Ես ցանկանում եմ, որ ՀՀ-ն լիովին ասոցացվի ԵՄ-ին, բայց, միաժամանակ, ես չեմ ուզում ստիպել ՀՀ-ին, որ խզի իր տնտեսական կապերը ՌԴ-ի հետ»,- ասաց նա:

Ֆրանսիայի նախագահը խոսեց նաեւ Ցեղասպանության 100-ամյա տարելիցին Հայաստանում ներկա գտնվելու ցանկության մասին եւ օգտագործեց «սարսափելի Եղեռն» եզրույթը: Սերժ Սարգսյանն էլ նշեց, որ Օլանդի ներկայությունը ՀՀ-ում կլինի ամենախոսուն վկայությունը, որ Ֆրանսիան համերաշխ է հայ ժողովրդի եւ Հայաստանի հետ: