Ապրելով մեր երկրում` Մանուշյանը չմոռացավ իր հայրենիքի մասին. Ֆրանսուա Օլանդ

Ֆրանսիայի նախագահ Ֆրանսուա Օլանդի` Հայաստան պետական այցի շրջանակներում այսօր նախագահներ Սերժ Սարգսյանը և Ֆրանսուա Օլանդը մասնակցել են բանաստեղծ, ֆրանսիական Դիմադրության շարժման մարտիկ, Ֆրանսիայի ազգային հերոս Միսաք Մանուշյանի անվամբ Երևան քաղաքում անվանակոչված պուրակի բացման արարողությանը:

Երկու երկրների նախագահները շնորհակալություն են հայտնել միջոցառման կազմակերպիչներին և երևանցիներին արարողությանը մասնակցելու և Միսաք Մանուշյանի հիշատակը հարգելու համար:

«Մանուշյանը Ցեղասպանություն վերապրածներից է: Ֆրանսիա գալով` նա փախել է սարսափելի ջարդերից և, ապրելով մեր երկրում, նա մի քանի տարի անց զենք վերցրեց, պաշտպանեց մեր երկրի անկախությունը` առանց մոռանալու իր հայրենիքի մասին»,- ելույթում նշեց Ֆրանսիայի նախագահ Ֆրանսուա Օլանդը:

«Մենք երբեք չենք մոռանա, թե ինչ արեցին ֆրանսահայերը Ֆրանսիայի վերակառուցման և մշակույթի զարգացման համար: Հայաստանի և Ֆրանսիայի ժողովորդները նույն արժեքներն ունեն: Ես շատ ուրախ եմ` մասնակցելու պուրակը Մանուշյանի անունով անվանակոչելու արարողությանը»,- ասաց նա:

«Տողեր` հիշելու համար» կամ «Կարմիր Ավիշ»` Լուի Արագոնի նշանավոր բանաստեղծությունը, որը նա գրել է` Ֆրանսիայի ազգային հերոս, նշանավոր բանաստեղծ Միսաք Մանուշյանի վերջին նամակից ներշնչված, և  որի հիման վրա երգ է գրել ու կատարել Լեո Ֆերեն, արդեն ունի հայերեն տարբերակ: Երգը հեղինակել է նշանավոր կոմպոզիտոր Ռոբերտ Ամիրխանյանը: Այն այսօր Միսաք Մանուշյանի անվան պուրակի բացման արարողության ժամանակ կատարեց Հայաստանի կամերային երգչախումբը:  

«Միսաք Մանուշյանը մինչև կյանքի վերջը շարունակեց մնալ հայ, իրական հայ` իր ուժերով և գենետիկ ծնունդով: Նա, միևնույն ժամանակ,  անձնվիրաբար ծառայեց մարդկության ազատության խնդրին»,- լրագրողների հետ ճեպազրույցում ասաց Ռոբերտ Ամիրխանյանը և հավելեց. «Ես ուրախ եմ, որ մարդիկ սիրով լսեցին այդ կատարումը, քանի որ այն ստեղծվել է անհրաժեշտության և ոգևորության արդյունքում»: