Նստացույց. «Եղանակը հիանալի է, տրամադրությունը՝ մարտական, պահանջներն էլ՝ ձեռքներիս»

Հասնելով Ֆրանսիայի հրապարակ՝ «Դեմ եմ»-ի պահանջի երթի մասնակիցները ժամանակավոր նստացույց սկսեցին:

«Դեմ եմ»-ի անդամ Դավիթ Մանուկյանը հայտարարեց, որ իրենք որևէ մեկի տեղաշարժվելու իրավունքը չեն խախտում. ճանապարհները բաց են, մեքենաները երթևեկում են, ուստի իրենք իրենց քաղաքի սրտում մնալու են այնքան, որքան հարկ են համարում:

Դիմելով հատկապես նրանց, ովքեր այս բողոքի ակցիային հետևում են ուղիղ հեռարձակմամբ՝ Դավիթ Մանուկյանն ասաց. «Եղանակը հիանալի է, տրամադրությունը՝ մարտական, պահանջներն էլ՝ ձեռքներիս: Միացեք մեզ, եկեք շփվենք, ծանոթանանք ու մեր պահանջները պարտադրենք էս իշխանություններին»:

«Միացեք»,- վանկարկում են նստացույցի մասնակիցները:

«Դեմ եմ»-ը հայտարարել է, որ պայքարելու է այնքան, մինչև կենսաթոշակային կուտակային գանձումները կատարվեն միայն կամավոր սկզբունքով: