Ինչպիսի՞ն է Սերժ Սարգսյանի տրամադրությունը

Այսօր լրագրողների հետ հանդիպման ժամանակ, երբ Yerkir.am-ը ԱԺ ՀՀԿ խմբակցության պատգամավոր Համլետ Հարությունյանից հետաքրքրվեց, թե նախընտրական այս շրջանում ինչպիսին է Սերժ Սարգսյանի տրամադրությունը, ՀՀԿ-ական պատգամավորը, բառերով չկարողանալով արտահայտել նախագահի բարձր տրամադրությունը, գործի դրեց բութ մատը:

«Շատ լավ է նախագահի տրամադրությունը, նա կամային այնպիսի հատկանիշներով օժտված անձնավորություն է... Ես նրան այնպիսի իրավիճակներից դուրս գալուց եմ տեսել, որ սկի իմ մտքով չի անցել: Նախագահի կամային հատկանիշները երեւի աստվածատուր են: Այ էդ էպոսագետը, որ ասում եք, լավ կլինի ուսումնասիրի, թե այդքան կամքը, եռանդը, ուժը, նվիրվածությունը ոնց ա Աստված կուտակել Սերժ Սարգսյանի մոտ»,- հայտարարեց ՀՀԿ-ական պատգամավորը:

Համլետ Հարությունյանը շատ ՀՀԿ-ականների նման եւս վստահ է, որ Սերժ Սարգսյանը հաղթելու է առաջիկա նախագահական ընտրություններում: Իսկ գործող նախագահի մրցակիցներ համարում է Հրանտ Բագրատյանին, Րաֆֆի Հովհաննիսյանին եւ Պարույր Հայրիկյանին:

Ի դեպ, Սերժ Սարգսյանի ամենամեծ առավելությունն, ըստ ՀՀԿ-ական պատգամավորի, այն է, որ նա անցել է պատերազմի թոհուբոհով: «Նա ոչ միայն աննկուն մարտիկ է, այլ նաեւ խելոք ռազմական ղեկավար»,- հայտարարեց նա: