Կառավարության դիրքորոշումն առոչինչ է

Այսօր Մատենադարանի մոտ  «Դեմ եմ պարտադիրին» շարժման հրավիրած հանրահավաքի ժամանակ շարժման մասնակից Դավիթ Մանուկյանը իր բողոքը հայտնեց կառավարության այն անդամներին, որոնք իրենց հայտարարություններով ճնշում են գործադրում քաղաքացիների վրա, և նրանցից մեկն էլ արդարադատության երիտասարդ փոխնարարարն էր, որի հայտարարությունը իրականում կառավարության դիրքորոշումն էր:

Փաստորեն, Դավիթ Մանուկյանի խոսքով, ժողովրդի դիրքորոշումը  տարբերվում է կառավարության  դիրքորոշումից, բայց քաղաքացիները  հաստատակամ են ոչ թե խնդրելու,  այլ ստիպելու`  ենթարկվել օրենքին:

«Ցանկացած կառառավարության  դիրքորոշում եթե  չի համընկնում ժողովրդի  դիրքորոշման հետ,  ուրեմն այդ կառավարության դիրքորոշումը առոչինչ է»,- ասաց Դավիթ Մանուկյանը` հավելելով, որ այսօրվա հանրահավաքը ավելի շատ փորձնական հանդիպում է, որ միմյանց հետ համաձայնության  գան`  հետագա անելիքների հետ կապված:

Շարժման մասնակիցներից Կարեն Հովհաննիսյանն էլ հայտարարեց, որ չեն եկել ճառ կարդալու, այլ եկել են բարձրաձայնելու իրենց հստակ պահանջների մասին, պահանջ, որն անհապաղ լուծում է պահանջում: Եվ այդ հստակ պահանջն է, որ ՊԵԿ-ը իր հաշվետվություններից հանի «պարտադիր» դաշտը, դադարեցնի անհիմն պահումները, վերադրաձնի անհիմն ձևով մինչ այժմ կատարված պահումները:

«Եթե իշխանությունները  չեն կարողանում լուծում տալ այս հարցին, ապա մենք` ժողովուրդս,  պարտավորվում ենք շարունակել մեր պայքարը  այնքան ժամանակ, մինչև այս հարցին լուծում տրվի` ի նպաստ պետության և ի շահ ժողովրդի: Շտապեք, պետական այրեր, ժողովրդի կամքն օրենք է: Մի պահ դուրս եկեք ձեր աշխատասենյակներից ու մտեք իրականություն ու գործեք ի նպաստ ձեր ժողովրդի»,- ասաց նա` հավելելով, որ իշխանությունները քաղաքացիներին պարտադրում են կա'մ պարտադիր կուտակայինը, կա'մ արտագաղթը, սակայն «Դեմ եմ» շարժումն ընտրել է երրորդ տարբերակը` պայքարը: