Հետաքրքիր մոտեցում` խախտում արած մեծահարուստը 5-10 հազար դրամ տուգանվելու փոխարեն թող փողոց մաքրի

Ճանապարհատրանսպորտային պատահարների կամ երթեւեկության կանոնների խախտման համար նշանակված տուգանքների համաչափությունը, արդարացվածությունը ուսումնասիրող աշխատանքներում, ըստ արդարադատության նախարար Հրայր Թովմասյանի, խնդրահարույց, բայց շատ հետաքրքիր մոտեցումներ էլ են դիտարկվում: Այսօր նախարարը լրագրողներին ներկայացրեց արեւմտաեվրոպական մի շարք երկրներում կիրառտվող մոտեցումը, ըստ որի` տուգանքները մարդուն նշանակվում են' ելնելով տվյալ անձի սոցիալական վիճակից:

«Օրինակ` եթե տվյալ վարորդը մեծահարուստ է' ապահովված է, նրան տուգանք չի նշանակվում, այլ տիպի տույժեր են նշանակվում, օրինակ` հանրային աշխատանք: Որովհետեւ ենթադրվում է, որ նրանց նշանակված տուգանքը չի հասնի իր նպատակին, քանի որ նա վճարունակ է, կարող է վճարել ու նորից խախտում անել, այսինքն' նրա համար որեւէ խնդիր այստեղ չկա: Բայց հանրային աշխատանքին մասնակցելը, օրինակ` փողոց մաքրելը, եթե պատկերացնենք, ավելի շատ կաշկանդող նշանակություն կունենա, քան 5 կամ 10 հազար դրամ տուգանք վճարելը»,- ասաց Հրայր Թովմասյանը:

Լրագրողներին հորդորելով այս օրինակը հրապարակումների վերնագրեր չդարձնել` նախարարը կրկնեց, թե այս մոտեցումը կարող է վիճահարույց լինել, բայց նաեւ այս համատեքստում պետք է դիտարկել, թե որ տուգանքը կամ տույժի տեսակն է, որ կլինի կաշկանդող եւ տվյալ խախտումից զերծ մնալու առումով առավելապես կհասնի իր նպատակին,  այն է' կունենանք ավելի անվտանգ երթեւեկություն: