Կառավարությունը ոչինչ չի զիջելու կենսաթոշակային բարեփոխումների հարցում

«Դեմ եմ պարտադիրին» շարժման հետ երկխոսություն սկսելու` վարչապետի հայտարարությամբ կառավարությունը ոչ թե հետքայլ, այլ առաջ քայլ է անում. լրագրողների հետ զրույցում կառավարության նիստից հետո հայտարարեց աշխատանքի և սոցիալական հարցերի նախարար Արտեմ Ասատրյանը:

Լրագրողների դիտարկմանը, թե ի՞նչ է պատրաստվում զիջել կառավարությունը պարտադիր կուտակային կենսաթոշակային համակարգի բարեփոխումներում, Արտեմ Ասատրյանը պատասխանեց, թե այս պահին որեւէ լրացուցիչ առաջարկություններ կամ դիտարկումներ չի կարող ներկայացնել:

«Ընդհանրապես' մենք միշտ պատրաստ ենք եղել, ու վարչապետի ասածը, կարծում եմ, շատ հստակ էր այդ առումով, որ պետք է համատեղ աշխատանքներ իրականացվեն, քանի որ այս դեպքում հստակ էր, որ և' կառավարության, և' իշխանությունների այսօրվա քաղաքականությունն ուղղված է մեր երկրի ապագային և զարգացմանը: Նաև երիտասարդները նույնպես նույն մտահոգություններն ու խնդիրներն ունեն: Այս դեպքում չի կարող տարընթերցումների տեղիք տալ»,- նշեց Արտեմ Ասատրյանը:

Լրագրողները նախարարից հետաքրքրվեցին, որ վարչապետն իր հայտարարության մեջ նշեց, թե անընդունելի է «կա'մ ամեն ինչ, կա'մ ոչինչ» սկզբունքը, այդ դեպքում ի՞նչ է զիջելու կառավարությունը, ու եթե երկխոսությունը սկսվելու է, ու ոչինչ չի զիջվելու, ի՞նչ իմաստ ունի այդ երկխոսությունը:

«Կառավարությունը, նախատեսված եւ իրականացվող քաղաքականության առումով, իրականացնելու է իր քայլերը: Այլ խնդիր է, որ կան մտահոգություններ, դիտարկումներ ու խնդիրներ, որոնք հիմա բազմակողմանի քննարկում են պահանջում, որոնց շրջանակներում կարող են լինել ամենատարբեր միտումներ»,- ասաց նախարարը:

Վերջում Արտեմ Ասատրյանը նշեց, թե ինքը հակված է բացառելու «Դեմ եմ պարտադիրին» շարժումը քաղաքականացնելու հնարավորությունը, քանի որ չի կարծում, թե այն կօգնի ընդհանուր գործին կամ լուծվելիք խնդիրներին: