Ոչ իշխանական 4 ուժերը արտահերթ հարցով կներկայացնեն իրենց օրակարգը

ԱԺ ոչ իշխանական չորս ուժերն այսօր քննարկել են ընդհանուր մոտեցումները և տնտեսական ծրագրերը, քննարկվել են համատեղ համագործակցության հարթակները: Այս մասին լրագրողների հետ հանդիպման ժամանակ ասաց ԱԺ «Ժառանգություն» խմբակցության ղեկավար Ռուբեն Հակոբյանը:

Հանդիպման առաջին մասում քննարկվել են մարտի 22-ի հանրահավաքի կազմակերպչական աշխաանքները, իսկ երկրորդ մասում` չորս ուժերի միասնական օրակարգի հարցը: Ռուբեն Հակոբյանի խոսքով՝ «Ժառանգությունը» ցանկանում է արմատական իշխանափոխություն, սակայն կոնսենսուսային հարթության վրա պետք է ձևավորվի օրակարգը, որը կիսատ է մնացել ու կշարունակվի մարտի 19-ին:

Նա նշեց, որ օրակարգի ներկայացման ժամկետների հարցում վերջնական որոշում չկա, սակայն առաջիկա քառօրյայում արտահերթ հարցով ներկայանալու են: «Կառավարությանը հրաժարական ներկայացնելու հարցը շտապողականության դաշտում չպետք է դիտել, քանի որ դա շատ լուրջ հարց է ու գործընթաց, որը որոշակի ժամանակ է պահանջում»,- ասաց Ռուբեն Հակոբյանը: