Մարտի 22-ի հանրահավաքին մասնակցելու են ոչ իշխանական չորս ուժերը

Քիչ առաջ ավարտվեց ոչ իշխանական չորս ուժերի հանդիպում-քննարկման առաջին մասը, որին մասնակցում էին նաև «Դեմ եմ պարտադիրին» շարժման մի խումբ անդամներ: Այս մասին ԱԺ-ից տեղեկացնում է Yerkir.am-ի թղթակիցը:

Հանդիպման երկրորդ մասը դեռ շարունակվում է, քննարկվում է ոչ իշխանական չորս ուժերի միասնական օրակարգը:

Լրագրողների հետ զրույցում «Դեմ եմ պարտադիրին» շարժման անդամները նշեցին, որ չորս ոչ իշխանական խմբակցությունների հետ քննարկվել են առաջիկա մարտի 22-ի հանրահավաքին վերաբերող հարցերը: Նրանք նշեցին, որ այդ հանրահավաքին մասնակցելու են չորս խմբակցությունների ներկայացուցիչներ:

«Մեր շարժումը համագործակցում է քաղաքական չորս խմբակցությունների հետ, նրանք խորհրդարանում ներկայացնում են մեր շահերը: Ուստի այս շարժումը չի կարող քաղաքականացվել, այն ի սկզբանե եղել է քաղաքացիական, այդպիսին էլ կմնա»,- ասացին «Դեմ եմ պարտադիրին» շարժման անդամները: