«Վեստա» ընկերությունը տուգանվեց 15 մլն դրամով

ՏՄՊՊՀ դիտակետում է հայտնվել կենցաղային տեխնիկայի վաճառքով զբաղվող «Վեստա» խանութը, որը գովազդում է, թե «Սամսունգ», «Ֆիլիփս», «Շարփ», «Պանասոնիկ», «Մասթըրքուք», «Զելմեր», «Արդո», «Ֆուջիթսու», «Ֆիշեր», «Ֆագոր» և այլ առաջատար ընկերությունների պաշտոնական ներկայացուցիչն է Հայաստանում: Նման բովանդակությամբ գովազդային վահանակներ են փակցված նաև «Վեստայի» վաճառակետերում:

ՏՄՊՊՀ-ն պահանջել է ներկայացնել վերոնշյալը հիմնավորող համապատասխան փաստաթղթեր: Սակայն «Վեստա»  խանութները ներկայացնող «Փրիթի Ուեյ»  ընկերությունը հանձնաժողովին է ներկայացրել միայն մի քանի ընկերությունների կողմից տրված սերտիֆիկատներ: Դրանց ուսումնասիրությունից պարզվել է, որ  այդ սերտիֆիկատները կարող են վկայել միայն գործընկերների միջև առկա որոշակի առևտրային հարաբերությունների մասին, սակայն չեն կարող հաստատել «պաշտոնական ներկայացուցիչ»  լինելու հանգամանքը:

«Այս  կամ այն հայտնի ընկերության պաշտոնական ներկայացուցիչ հանդիսանալու մասին հայտարարությունները միշտ չէ որ համապատասխանում են իրականությանը: Հատկապես` կենցաղային տեխնիկայի վաճառքի ոլորտում ընկերությունները գովազդում են, որ իրենք հանդիսանում են որևէ հայտնի բրենդի պաշտոնական ներկայացուցիչը Հայաստանում: ՏՄՊՊՀ-ը ուսումնասիրություն  է իրականացրել այս ոլորտում և պարզել, որ նման հայտարարությունները հաճախ անհիմն են»,- նշում է ՏՄՊՊՀ-ն:

Հանձնաժողովը այս  և այլ փաստերի հիման վրա հաստատված է համարում այն հանգամանքը, որ «Վեստա» խանութը դրսևորել է անբարեխիղճ մրցակցություն, քանի որ մի շարք հայտնի ընկերությունների պաշտոնական ներկայացուցիչը լինելու հանգամանքը այս դեպքում դիտվում է որպես հասարակության մոլորեցում:

Օրենքի խախտման և անբարեխիղճ մրցակցության դրսևորման համար  «Վեստա» ընկերության հանդեպ ՏՄՊՊՀ այսօրվա նիստի ժամանակ կիրառվեց տուգանք՝  15  մլն դրամի չափով: