Թուրքը ինձնից վախեցել ա, ես դրանց պպզացրել, երգցրել եմ, բայց լրագրողներով էսօր ինձ խեղդում եք. Մանվել Գրիգորյան

Այսօր Եռաբլուր այցելած գեներալ Մանվել Գրիգորյանը, պատասխանելով լրագրողների հարցերին` այսօրվա Հայաստանի վիճակի վերաբերյալ, նշեց. «Ճիշտ ա, թերություններ շատ ունենք, բայց հույս, հավատ էլ ունենք: Մեր երկրի տերերը էս պատանիներն են, ոչ թե շատ շատերը, որ էսօր կան»: Նա շարունակ ցույց էր տալիս պատանի երկրապահներին` ասելով, որ նրանցով է հպարտանում:

Մեր հարցին, արդյո՞ք մի քանի տարի անց այդ պատանիները չեն արտագաղթելու, Մանվել Գրիգորյանը պատասխանեց. «Ոչ, համ էլ արտագաղթողներին մի' մեղադրեք, մարդ են, տարբեր խնդիրներով էթում են, էլի կգան: Կարող ա` մեկը նեղացած ա էթում, մյուսը իրա վատ վիճակից ա էթում»:

Պատասխանելով Yerkir.am-ի այն հարցին` արդյո՞ք մեզ հիմա անհրաժեշտ է սպարապետ Վազգեն Սարգսյանի պես ուժեղ ձեռք ունեցող մարդ, Մանվել Գրիգորյանը պատասխանեց. «Ես ասում եմ` այո, ուժեղ ձեռք ունենք, դա մեր սերունդն ա, դուք ուրիշ վատերին մի նայեք, այ էս փայլուն էրեխեքին նայեք»: Նրա խոսքով` սպարապետ Վազգեն Սարգսյանը կհպարտանար շատ ու շատ երևույթներով:

«Էսօր լրագրողներով էնքան շատ եք, վրա եք տվել: Թուրքը ինձնից վախեցել ա, ես դրանց պպզացրել, երգցրել եմ, բայց դուք էսօր ինձ խեղդում եք»,- նաեւ կատակեց գեներալը:

Նա խոսեց նաև ազատամարտիկների խնդիրների մասին: Մանրամասները` տեսանյութում: