Երևանի մետրոպոլիտենի տասնյակ աշխատակիցներ բողոքի են դուրս եկել

Այսօր առավոտյան Երևանի Կարեն Դեմիրճյանի անվան մետրոպոլիտենի վարչության շենքի դիմաց հավաքվել են մետրոպոլիտենի մի քանի տասնյակ աշխատակիցներ և բողոքում են կուտակային ռեֆորմի պարտադիր բաղադրիչի դեմ: 30-ից ավելի աշխատակիցներ, որոնց վրա տարածվում է օրենքը,  պատրաստել և ստորագրել են դիմում-բողոք, որը հանձնելու են Երևանի քաղաքապետ Տարոն Մարգարյանին:

Yerkir.am-ի լրագրողը հայտնում է, որ մետրոպոլիտենի աշխատակիցների բողոքին են միացել «Դեմ եմ» նախաձեռնության անդամները:

Yerkir.am-ի հետ զրույցում բողոքողները նշեցին, որ գործադուլի չեն դիմելու, որովհետև դա ծայրահեղ քայլ է, սպասելու են ՍԴ-ի որոշմանը:

Նշենք, որ մետրոպոլիտենն ունի մոտ 1500 աշխատակից, որոնցից միայն 30-40-ն էին մասնակցում ակցիային: «Դեմ եմ» շարժման անդամները հայտարարեցին թե կասկածներ ունեն, որ մետրոպոլիտենի տնօրինությունը ճնշումներ է գործադրել իր աշխատակիցների վրա, այդ պատճառով էլ քիչ թվով աշխատակիցներ են ներկայացել բողոքի ակցիային: Նրանք կոչ արեցին բոլորին` գործադուլ սկսել, քանի որ, ըստ նրանց, դա է արդյունքի հասնելու միակ ճանապարհը: