Երևանի ընտրություններում հաղթելու դեպքում «Ելք»-ը մետրոպոլիտենի մեկ կայարան կկառուցի

Այսօր «Ելք» դաշինքի անդամ, Երևանի ավագանու ընտրությունների թեկնածու Դավիթ Խաժակյանը լրագրողներին ներկայացրեց իր կուսակցության ծրագրերն ու անելիքները: Նրա խոսքով` «Ելք»-ի ծրագրում առանձնացված է երեք դրույթ` տրանսպորտ, ասֆալտապատում և կոմունալ ոլորտ:

Տրանսպորտի ոլորտի վերաբերյալ Դավիթ Խաժակյանը նշեց, որ  մեծամասնություն ունենալու դեպքում մտադիր են ավտոբուսների քանակը հասցնել 80 տոկոսի, հիմա ավտոբուսների քանակը տրանսպորտային միջոցների 40 տոկոսն է: Մտադիր են բարեկարգել կանգառները, կարգի բերել ու կայունացնել չվացուցակները, պայքարել խցանումների դեմ, սկսել մետրոպոլիտենի նոր կայարանի կառուցումը:

«Մենք տեսնում ենք այն ֆինանսական միջոցները, որոնցով կսկսենք նոր կայարանի կառուցումը: Այդ ցանցը կարող է սպասարկել Աջափնյակ և Դավիթաշեն համայնքը, ինչը զգալի կթեթևացնի տրանսպորտային ծանրաբեռնվածությունը»,- ասաց Դավիթ Խաժակյանը:

«Ելք»-ի անդամները ունեին մոտավոր հաշվարկներ, թե որքան կարժենա մետրոպոլիտենի նոր կայարանի շինարարությունը` մոտ 250 միլիոն եվրո: Ըստ Դավիթ Խաժակյանի` այդ գումարը կրկնակի գերազանցում է Երևանի բյուջեն, սակայն, քանի որ մետրոպոլիտենի նոր կայարանի կառուցումը «Ելք»-ը համարում է առաջնային, ուստի ծրագրում պետք է ներգրավի կառավարությանը` փորձելով միջազգային վարկերի, բյուջեից լրացուցիչ հատկացումների միջոցով ընթացք տալ այդ հարցին: Նրա կարծիքով` նոր կայարանը հնարավոր կլինի կառուցել 5 տարվա ընթացքում:

Ասֆալտապատման բնագավառում պետք է վերանայել տենդերների մեխանիզմը, քանի որ այդտեղ կան կոռուպցիոն դրսևորումներ: Տենդերին մասնակցող ընկերությունները պետք է ունենան նաև ճանապարհի շահագործման երաշխիքներ` 2-3 տարվա ընթացքում սպասարկելով ասֆալտը: