Եթե մեզ պաշտոնական դիմեն, կքննարկենք. Մարուքյանը` Րաֆֆի Հովհաննիսյանի առաջարկի մասին

Երեկ «Ժառանգություն» կուսակցության նախագահ Րաֆֆի Հովհաննիսյանը հայտարարեց, որ շատ ուրախ է, որ «Ելքը» մտել է խորհրդարան, և կարծիք հայտնեց, որ նրանք, ովքեր ընդհանուր մոտեցումներ ունեն ներքին եւ արտաքին հարաբերությունների, ՀՀ-ի շահի եւ ինքնիշխանության հարցում, պետք է համագործակցեն:  Փաստորեն, Րաֆֆի Հովհաննիսյանը նոր առաջարկ արեց` գնալ կուսակցությունների խոշորացման` հրավիրելով նաև «Ելք» դաշինքին:

«Ելք» խմբակցության պատգամավոր Էդմոն Մարուքյանը Yerkir.am-ի հետ զրույցում հայտարարեց, որ իրենց դաշինքը արտախորհրդարանական բոլոր ուժերի հետ էլ համագործակցության եզրեր տեսնում է: Ինչ վերաբերում է Հովհաննիսյանի առաջարկին` գնալ կուսակցությունների խոշորացման, նա ասաց, որ կարծիք է` արտահայտվել է:  «Ես չեմ կարող որևէ բան ասել, մեզ որևէ առաջարկ չի հասել, ուստի մենք չենք էլ քննարկել»,- ասաց նա` հավելելով. «Եթե մեզ պաշտոնական դիմեն, կքննարկենք»: