Հրապարակվելու են այն ընկերությունների անուները, որոնք ճնշումներ են իրականացնում իրենց աշխատողների վրա

Պարբերաբար հրապարակվելու են այն ընկերությունների անունները, որոնք ճնշումներ են գործադրում իրենց աշխատողների վրա, որպեսզի նրանք ընտրեն կենսաթոշակային ֆոնդեր: Այս մասին այսօր լրագրողներին հայտնեցին «Դեմ եմ պարտադիրին» շարժման անդամները:

Մասնավորապես` Դավիթ Մանուկյանը նշեց, որ մի շարք դպրոցներում ու մանկապարտեզներում, «Արմսուիսբանկ»-ում, «Էլցանցեր» և «Գարանտ Ինշուրանս» ընկերություններում ստիպում են ընտրել կենսաթոշակային ֆոնդեր` չնայած ՍԴ որոշմանը:

«Անշուշտ, կան ճնշումներ աշխատողների վրա, այսինքն` դեռ գործում է ստիպելու ռեժիմը: Խորհուրդ ենք տալիս ֆեոդալական  մշակույթ  կրողներին` ուշքի գալ ու տեսնել, որ մեր դարում նման ֆեոդալական մոտեցումներն  այլևս անթույլատրելի են: Մենք աշխատողների կողքին ենք լինելու: Մենք  կոչ ենք անում բոլորին` չենթարկվել ճնշումներին և ցուցաբերել մասսայական ըմբոստություն»,- ասաց Դավիթ Մանուկյանը:

Նա նշեց, որ ակտիվ իրազեկման աշխատանքներ են տարվում մարզերում: Վանաձորում, Կապանում, Ալավերդիում ու Գյումրիում մարդիկ ոտքի են կանգնում նման ճնշումների դեմ:

«Դեմ եմ պարտադիրին»  շարժման անդամները խորհուրդ են տալիս բոլոր աշխատողներին` դիմումով դիմել իրենց գործատուին, որ դեռևս չեն պատրաստվում ընտրել ֆոնդ, և խնդրել գործատուին դեռևս  չփոխանցել աշխատավարձի 5 տոկոսը, որպեսզի գործատուն չներկայացնի «մանկապարտեզային պատճառաբանություններ», թե աշխատողն իրեն չի տեղեկացրել իր դիրքորոշման  մասին:

Նրանք նշեցին նաև, որ գործատուների իրականացրած ճնշումները քրեական  օրենսգրքի  խախտում են` ստորադասի նկատմամբ լիազորությունների չարաշահման առումով: Կոչ արեցին  բոլոր քաղաքացիներին` դրսևորել  համարձակություն ու ճնշումների դեպքում դիմել  իրավապահ մարմիններին: