Կիրառվում է մարզումային նոր մոդել.արդյունքների մասին խոսել դեռ վաղ է. Դավիթ Թորոսյան

Հունվարի 17-ից սկսած՝ բռնցքամարտի Հայաստանի մեծահասակների և երիտասարդների հավաքականները՝ հավաքականի նոր գլխավոր մարզիչ Դավիթ Թորոսյանի գլխավորությամբ  համատեղ հավաք են անցկացնում Ծաղկաձորում:           

Հավաքը, որը  կտևի մինչև հունվարի 31-ը ուղղված է մարզիկների  ընդհանուր ֆիզիկական պատրաստվածության բարելավմանը:

Պատասխանելով yerkir.am-ի հարցերին՝ հավաքականի գլխավոր մարզիչ Դավիթ Թորոսյնը խոսեց բռնցքամարտիկների ընդհանուր մարզավիճակից և նշեց, որ միայն Հայաստանի առաջնությունից հետո կձևավորվի իսկական հավաքական:

«Տղաների ընդհանուր ֆիզիկական վիճակից գոհ եմ: Կիրառվում է մարզումային նոր մոդել, այսինքն իրենց համար է այն նոր, որը, կարծում եմ`  բերելու է ցանկալի արդյունքի:

Տղաների մոտ արտակարգ բարձր տրմադրւոթյուն է: Թիմի մեջ չափազանց լավ մթնոլորտ է ձևավորվել՝ բոլորը եղբոր պես են:

Ինչ վերաբերում է հարցին`  երիտասարդներն են ավելի լավ մարզավիճակում թե մեծահասակները՝ չեմ կարող վերպահումներ անել, բոլորը իրենց չափով մարզվում են: Նրանց առջև դրված է խնդիր, մարզումային նոր մոդել, յուրաքանչյուրն իր չափով անում է ամեն ինչ:

Արդյունքների մասին խոսելը դեռ վաղ է: Ճիշտն ասած՝ ժառանգել եմ ոչ այնքան լավ վիճակի թիմ, հիմնականում երիտասրդներ են: Արդյունքների համար պետք է երկրատև աշխատանք: Ես կախարդական փայտիկ չունեմ, որ խոստումներ տամ և փայտիկով վերածեմ իրականության:

Բռնցքամարտի Հայաստանի առաջնությունից հետո ինձ համար արդեն  կձևավորվի թիմ: Ես կիմանամ՝  ինչի հետ գործ ունեմ»,-ասաց հավաքականի գլխավոր մարզիչը:

Հետևելով մարզումների և շփվելով բռնցքամարտիկների հետ՝ հստակ երևում էր, բոլորը լավ տրամադրություն ունեն և մեծ եռանդով մարզվում են: Կատարված փոփոխությունները գնահատում էին դրական: Մարզումային նոր մոդելը  նրանց դուր էր եկել: Հատկապես նրանց ուրախացնում էր այն փաստը, որ ֆեդերացիայի նորանշանակ նախագահը, այսպես ասած,  իրենցից մեկն է:

Առջևում բռնցքմարտի Հայաստանի մեծահասակների առաջնությունն է, որը կմեկնարի փետրվարի 28-ին, որի ավարտից անմիջապես հետո կկայնա երիտասարդների առաջնությունը: