Պատմությունը պետք է սիրի կոմպոզիտորին

Այսօր պետք է մեկնարկեր Հայ կոմպոզիտորական արվեստի փառատոնը` նվիրված Ռոմանոս Մելիքյանի 130 եւ կոնսերվատորիայի 90-ամյակին, սակայն փառատոնի մեկնարկը հետաձգվում է:

Լրագրողների հետ զրույցում Կոմպոզիտորների միության նախագահ Արամ Սաթյանը նշեց, որ ՀՀ նախագահ Սերժ Սարգսյանի հոր մահված հետ է կապված համերգի հետաձգումը. փառատոնի մեկնարկը կտրվի հունվարի 23-ին:

Սաթյանը, կարեւորելով փառատոնի դերը հայ մշակութային կյանքում, նշեց, որ Կոմպոզիտորների միությունը պատրաստ ամեն կերպ աջակցել փառատոնին: «Միությունը կաջակցի նաեւ փառատոնի ծրագրում ընդգրկվելիք ստեղծագործությունների ընտրության հարցում, քանի որ շատ կարեւոր է ճիշտ ժամանակակից երաժշտություն մատուցելը»,- ասաց նա:

Հայաստանի պետական երիտասարդական նվագախմբի գեղարվեստական ղեկավար եւ գլխավոր դիրիժոր Սերգեյ Սմբատյանն էլ նշեց, որ փառատոնն արդեն հետաքրքիր պատմություն ունի, որը, ըստ նրա, 2014-ին ավելի հագեցած կլինի:

«2014-ին փառատոնի ֆորմատը մի քիչ կփոխվի` շատ հետաքրքիր մենակատարներ ենք հրավիրել եւ ծրագիր ընտրել: Փառատոնը զտում եւ ընտրում է այն կոմպոզիտորներին, որոնք մեր ժամանակակիցներն են: Մենք պետք է անընդմեջ կատարենք մեր ժամանակակիցների գործերը: Իսկ թե ո՞վ կմնա պատմության մեջ, պատմությունը կորոշի. պատմությունը պետք է սիրի կոմպոզիտորին, կատարողի գործը նրանց ստեղծագործությունները հնչեցնելն է»,- ասաց Սմբատյանը: