Մեր պատմությունը չունի ոչինչ, որից պետք է ամաչել. Յըլդըրըմը՝ Աթաթուրքի վերաբերյալ սենսացիոն հայտարարությունների մասին

Թուրքիայի վարչապետ Բինալի Յըլդըրըմը նույնպես անդրադարձել է Աթաթուրքի հասցեին վիրավորանք հնչեցնողներին. տեղեկացնում է Haberler-ը:

Խստորեն դատապարտելով նրանց՝ Յըլդըրըմը հայտարարել. «Աթաթուրքը և մեր հանրապետության հերոսները մեր ազգային արժեքներն են, հետևաբար` մենք չենք կարող ընդունելի համարել նման որակումները: Մենք նման արարքները խստորեն դատապարտում ենք և պատրաստ ենք այդ հարցով դիմել օրենքի միջոցներին»:

Ըստ նրա՝ Թուրքիայի պատմությունը չունի ոչինչ, որից կարելի է ամաչել: «Կարծում ենք, որ սա դիտավորյալ արված բան է»,- նշել է Թուրքիայի վարչապետը:

Հիշեցնենք, որ օրեր առաջ Թուրքիայում Աթաթուրքի անվան շուրջ սկանդալ էր բարձրացել: TVNet հեռուստաալիքով հեռարձակվող «Խորքային պատմություն» հաղորդման ժամանակ թուրք հեղինակ Սուլեյման Եշիլյուրթը հայտարարել էր, որ Աթաթուրքի որդեգիր դուստր Աֆեթ Ինանը եղել է Թուրքիայի «ոչ պաշտոնական առաջին տիկինը»:  Որդեգրված աղջկա հետ սիրային կապ ունենալու համար Աթաթուրքի հասցեին մեղադրանք հնչեցնելու համար  դատական գործ էր բացվել հաղորդման հեռարձակումից անմիջապես հետո:

Նման սենսացիոն հայտարարություն էր հնչեցրել նաև թուրք հոգևորական Հասան Աքարը: Նա հայտարարել էր, որ Աթաթուրքը բիճ է, իսկ նրա մայրը՝ հասարակաց տան աշխատակցուհի: «1938թ.-ին սատկած այդ վիժվածքի նմանի մայրը Սալոնիկում հասարակաց տան աշխատող է եղել, դա հայտնի բան է», - ասել էր հոգևորականը: