Լկտիությունը՝ տաքարյունության, ցինիզմը և դատարկաբանությունը՝ ինտելեկտի հոմանիշ. Նաիրա Զոհրաբյանը՝ ՀՀԿ-ի մասին

ԱԺ նիստում, երբ քննարկվում էր «Բարձրագույն և հետբուհական կրթության մասին» օրենքում փոփոխություններ ու լրացումներ կատարելու վերաբերյալ օրենքի նախագիծը, ԱԺ ԲՀԿ խմբակցության քարտուղար Նաիրա Զոհրաբյանը շեղվեց բուն թեմայից ու շարունակեց ԿԳ նախարար Արմեն Աշոտյանի հետ երեկվա բանավեճը:

«Ես հասկանում եմ, որ տվյալ քաղաքական ուժի համար լկտիությունը տաքարյունության հոմանիշն է, ցինիզմը և դատարկաբանությունը՝ ինտելեկտի հոմանիշը, ակնհայտ տափակախոսությունը՝ կրեատիվ լինելու հոմանիշը»,- ասաց նա եւ հորդորեց նախարարին՝ ինտելեկտին պարբերաբար հղումներ անելուց առաջ հետևել, որ Հանրապետականի կարկառուն ներկայացուցիչ օգտատերերի «ֆեյսբուքյան ճախրանքներում խայտառակ ուղղագրական սխալներ չլինեն»:

«Սովորելը երբեք ուշ ու ամոթ չէ, ինքնուսույցներ վարձեք, փողը այլ ֆունկցիոնալ նշանակություն ևս ունի, բացի ընտրություններ կեղծելուց, և նապոլեոնիզմով տառապելը լուրջ շեղում է: Դատելով որոշ դեպքերի խիստ կլինիկական պրոգրեսից` դրա դեմ պատվաստումը առ այս պահը, ցավոք, դեռևս գտնված չէ, առողջ եղեք»,- խոսքը եզրափակեց Զոհրաբյանը:

Նրա ելույթից հետո ԱԺ նախագահ Հովիկ Աբրահամյանը նշեց, որ պատգամավորը թեմայից շեղվեց: «Հանրությանը շեղում եք, այլ հարց ենք քննարկում: Հանրությունն է, որ ձեր խոսքերին դիմանում է, ձեր կարկառուն մտքերին»,- ասաց նա: