Ջհանդամը ժողովուրդը, կամ քեֆ անողի քեֆը չի պակասում

Մինչ ԱԺ չորս խմբակցությունները հարմարավետ տեղավորվում էին ԱԺ նիստերի դահլիճի իրենց աթոռներին եւ պատրաստվում կենսաթոշակային համակարգի պարտադիր կուտակային բաղադրիչը մեկ տարով հետաձգելու հարցով արտահերթ նիստին, ՀՀԿ-ական եւ ՕԵԿ-ական պատգամավորները (սրանք էլ վերջին պահին գլխի ընկան կոալիցիոն գործընկերոջ որոշման մասին` ՀՀԿ լայեղ չէր արել բոյկոտի մասին նախօրոք տեղեկացնել) չարաճճի աշակերտների պես «թռան» նիստից` հարգելի պատճառով: Մի քանի ժամից հարգելի գործընկերոջ` Վարդան Այվազյանի դստեր հարսանիքն է, իսկ հարսանիքին ո'չ աշխատանքային հագուստով կգնաս, ո'չ էլ առօրյա սանրվածքով:

Եվ մինչ ընդդիմադիրները փախստական պատգամավորներին հետ բերելու ջանքեր էին գործադրում ՀՀԿ գրասենյակի մոտ, ասում են` պատգամավորները «շոպինգի» մեջ էին, ոմանք էլ` կին, թե` տղամարդ, գեղեցկության սրահներում: Տղամարդիկ նոր կոստյումներ ու փոխկապների ընտրությամբ էին զբաղված, իսկ կանայք' մակիյաժով ու սանրվածքով:

Ուշագրավ է, որ գործընկերոջ դստեր հարսանիքին ՀՀԿ-ի ահել-ջահելների պատրաստությունը քողարկելու համար ԱԺ-ում մնացել էր հին սերնդի Գալուստ Գրիգորիչը: Խեղճ մարդ... Լրագրողները հարցնում են` կարո՞ղ է ՀՀԿ-ն նիստը տապալեց Այվազյանի դստեր հարսանիքի պատճառով, սա էլ միամիտ-միամիտ, թե «հարսանիքներն առավոտյան չեն լինում»: Դե արի ու Գրիգորիչին բացատրի, որ հիմա իրենց ՀՀԿ-ական տղամարդիկ էլ են գեղեցկության սրահ շտապում` մանիկյուր-պեդիկյուր, մազահեռացում...հազար ու մի բան կա: Այստեղ են ասել` օ~ ժամանակներ, օ~ բարքեր:

Թե ինչո՞վ էին այդ պահին զբաղված կառավարության ղեկավարը եւ նախարարները, աղբյուրները լռում են: Բայց ասում են` վարչապետը տխրել է, որ իր հպարտություն հանդիսացող ՏՏ ոլորտի աշխատակիցները ևս դուրս են եկել բողոքի ակցիայի, հասել կառավարության մոտ, բղավել` ամոթ, հետո գնացել ՀՀԿ կենտրոնական գրասենյակի մոտ ու էլի` ամոթ, ամոթ, ամոթ... Այսքանից հետո ՏՏ ոլորտի ձեռքբերումներով ու առաջընթացով էլ ի՞նչ խղճով է ամեն պատեհ-անպատեհ առիթով հպատանալու վարչապետը: Բայց այսօր կառավարության շենքից այդպես էլ մարդ դուրս չեկավ, մի Գալուստ Գրիգորիչ էլ չունեի՞ն:

Ինչպես հաճախ է լինում, տարածքը հսկում էին մեզ հայտնի հանրապետական տատիկն ու ոստիկանները: Պատկերը շատ խոսուն էր: Մի կողմում ժողովուրդն էր` իր խնդիրներով, մտահոգություններով, պահանջներով, մյուս կողմում' Հանրապետականի անզուգական տատին, ոստիկաններն ու կառավարության, ՀՀԿ-ի դատարկ շենքերը:

Մեղադրելու էլ չի` մարդիկ «զբաղված» են, իսկ ժողովուրդը պահանջում է ու պահանջում...

Հետաքրքիր է` մեր երկում արդեն բողոքի ակցիայի են դուրս գալիս ՏՏ ոլորտի աշխատակիցները, իսկ գիտե՞ն նրանք, որ էս իշխանությունների համար կարևորը թանն ու քյաբաբն է, անպակաս քեֆերն ու տաշի-տուշին: Ջհանդամը, թե ժողովուրդը չի տուժում:

Բ. Գասպարյան