Երաժշտական հինգշաբթի` Արամ Խաչատրյանի տանը

Այսօր Արամ Խաչատրյանի տուն-թանգարանում կկայանա «Աշնանային երգ» խորագրով համերգը:

Yerkir.am-ի հետ զրույցում թանգարանի գիտաշխատող Տաթեւիկ Գրիգորյանը նշեց, որ իրենք նախաձեռնել են նոր ծրագիր` «Երաժշտական հինգշաբթի` Արամ Խաչատրյանի տանը», որի բացումն էլ կլինի այսօր:

«Յուրաքանչյուր ամիս կընտրենք հինգշաբթիներից մեկը եւ համերգներով կներկայացնենք մեր, ինչպես նաեւ արտերկրի լավագույն երաժիշտներին: Երաժշտական կատարումները կընդմիջվեն ֆիլմերի ցուցադրումներով կամ հետաքրքիր անակնկալներով»,- ասաց Գրիգորյանը:

Նրա տեղեկացմամբ` այսօր համերգին հայ կոմպոզիտորների վոկալ եւ դաշնամուրային ստեղծագործություններով հանդես կգան դաշնակահար Արմինե Գրիգորյանը եւ երգչուհի Աննա Մայիլյանը:

Համերգի շրջանակում կցուցադրվի Արամ Խաչատրյանի մասին պատմող ֆիլմ, նաեւ ունկնդիրների համար կկազմակերպվի շրջայց թանգարանի ցուցասրահներում: