Աղմուկ են բարձրացնում ընդամենը 50 դրամի շուրջ. Մարտին Վարդազարյան

Երևանի ավագանու ՀՀԿ խմբակցության անդամ, կոմպոզիտոր Մարտին Վարդազարյանը համարում է, որ տրանսպորտի սակագնի բարձրացման հարցը արհեստականորեն շատ է սրվել:

«Ի՞նչ է` մարդիկ ձու, պանիր, միս չե՞ն ուտում և ընդամենը 50 դրամի շուրջ այսպիսի աղմուկ են բարձրացնում»,- Yerkir.am-ի հետ զրույցում ասաց նա:

Ըստ Վարդազարյանի` այն մարդիկ, ովքեր հիմա այդ հարցն անընդհատ բարձրացնում են, ժամանակին լռել են ու հիմա էլ լռում են այլ ապրանքների թանկացումների ժամանակ:

Ըստ կոմպոզիտորի` մսի գինը 3 անգամ է բարձրացել, պանրի գինը` 2 անգամ, կաթի ու ձվի գները կրկնակի աճել են, իսկ տրանսպորտի 100 դրամ սակագինը միակ սակագինն է, որը չի փոփոխվել 1994 թվականից հետո, այն դեպքում, երբ ծախսերը հենց նույն բնագավառում ավելացել են: Նա հորդորում է, որ այս հարցին քաղաքացիները մոտենան ոչ թե աղմուկով, հակադրությամբ ու հարաբերությունները սրելով, այլ փոխըմբռնումով: Երևանի ավագանու անդամը նշեց, որ ստեղծված բարդ վիճակում հարկավոր է ուղիներ գտնել տրանսպորտի որակը բարելավելու համար:

Դիտարկմանը, թե` իր կարծիքով` ի վիճակի՞ են,  արդյոք, քաղաքացիները վճարել 150 դրամ, Մարտին Վարդազարյանը ճշտող հարց ուղղեց. «Դուք հաստատելո՞վ եք ասում, որ քաղաքացիները գումար չունեն, դա նշանակում է ընդանրապես չունե՞ն, թե՞ համապատասխան չունեն»: Վարդազարյանը համարում է, որ պետք է գտնվի ճանապարհ, որ անապահով խավի ներկայացուցիչները, ուսանողները, թոշակառուները, կարիքավորները, ովքեր այդ 50 դրամի կարիքն ունեն, կարողանան երթևեկել: Սակայն, որպես Երևանի ավագանու անդամ` նա այդ ցանկությունները ներկայացրել է ոչ թե առաջարկության տեսքով, այլ խոսակցությունների ու մտքերի փոխանակման ժամանակ:

Վարդազարյանը վերապահումով է մոտենում ամիսներ առաջ սկսված «Չենք վճարելու 100 դրամ» ակցիային: «Ես իմ աչքի տեսածն եմ պատմում` որ կոնսերվատորիայի դիմաց կանգնած էին մի խումբ` 100 դրամի ակցիան անող երեխաներ, նրանց մոտեցավ մի ջիպ, մեկը դուրս եկավ ու ասաց. «Դե հերիք ա, հիմա իջեք մի աստանովկա ներքև...»: Դա դուք անվանում եք ինքնաբուխ շարժո՞ւմ»:

Մեր հարցին` արդյո՞ք ժողովրդի վիճակը չի բարդանում հերթական անգամ, Մարտին Վարդազարյանը պատասխանեց. «Գիտեք, ժողովուրդ հասկացության ներքո հաճախ կատարվում են շատ ավելի տհաճ գործողություններ, բայց դա ուրիշ խոսակցություն է»: