Թուրքերը հայերի հետ խնդիր չունեն, սակայն Հայկական սփյուռքը աղմուկ է բարձրացնում. Էրդողանի կուսակից

Թուրքիայում իշխող «Արդարություն և զարգացում» կուսակցության՝ Բաթմանից պատգամավոր Զիվեր Օզդեմիրը Թուրքիայի Ազգային մեծ մեջլիսի նախագահ Ջեմիլ Չիչեքի և մի շարք այլ պատգամավորների հետ քննարկել է նախորդ շաբաթ Ֆրանսիա կատարած իր այցը:

Ըստ Haberler-ի՝ Օզդեմիրը, ներկայացնելով այդ այցի արդյունքները, հայտնել է, որ Ֆրանսիայում քննարկումներ է ունեցել «հայկական պնդումների» և Թուրքիայի՝ ԵՄ անդամակցության վերաբերյալ:

«Թուրքիայի ժողովուրդները հայերի հետ ոչ մի խնդիր չունեն, սակայն Հայկական սփյուռքն այդ հարցը (Հայոց ցեղասպանության ճանաչումը- խմբ.) դարձնում է աղմկահարույց թեմա»,- ասել է Օզդեմիրը:

Ինչ վերաբերում է Թուրքիայի անդամակցությանը ԵՄ-ին, նա ասել է, որ «տարիներ շարունակ Թուրքիային անարդարացիորեն սպասեցրել են»:  Օզդեմիրը հավելել է, որ Թուրքիայի անդամակցությունն ավելի շատ օգուտ կբերի ԵՄ-ին, քան Թուրքիային: