ԵՊՀ ուսանողները ստիպված են մնալ առանց բուֆետի

Հաշվի առնելով ուսանողների ցանկությունը` ԵՊՀ ֆիզիկայի ֆակուլտետի խորհրդակցությունների սրահն այլեւս ժամանակավորապես չի վերածվի բուֆետի. Yerkir.am-ի հետ զրույցում հայտնեց ԵՊՀ հասարակայնության հետ կապերի եւ լրատվության վարչության պետ Կարեն Գրիգորյանը:

Նա նշեց նաեւ, որ ուսանողները ստիպված են առանց բուֆետի մնալ` մինչեւ դատական նիստի ավարտը: «Հույս ունենք, որ մոտ ժամանակներս արդեն կավարտվի դատական քաշքշուկը, կարծես վերջն արդեն երեւում է»,- ասաց Գրիգորյանը` հավելելով, որ բուֆետները շարունակվում են փակ մնալ, քանի որ նախկինում դրանք շահագործող Hi Lunch ընկերությունը փակել է դռներն ու դուրս եկել:

Հիշեցնենք, որ հոկտեմբերի 29-ին ԵՊՀ ղեկավարությունը որոշել է ֆիզիկայի ֆակուլտետի խորհրդակցությունների սրահը ժամանակավորապես վերածել բուֆետի, ինչը դժգոհության ալիք էր բարձրացրել մի խումբ ուսանողների շրջանում: