Ոստիկանապետին հեռվից հեռու է խորհուրդներ տալիս

Դեռևս մեկ շաբաթ առաջ Արարատի նախկին մարզպետ Էդիկ Բարսեղյանը ոստիկանապետ Վլադիմիր Գասպարյանի հրամանով նշանակվեց ոստիկանապետի ավագ խորհրդական: Հիշեցնենք, որ Էդիկ Բարսեղյանը հոկտեմբերի 7-ին հրաժարականի դիմում էր ներկայացրել և ազատվել Արարատի մարզպետի պաշտոնից: Բայց ասում են` նախկին մարզպետը պաշտոնանկ լինելուց, անգամ նոր պաշտոնի նշանակվելուց հետո էլ դեռևս հանգստանում է, անգամ երկրից դուրս գնալ է հասցրել: Ոստիկանապետի ավագ խորհրդական նշանակված Բարսեղյանը, պարզվում է, աշխատանքի պատրաստվում է գնալ երկուշաբթի օրվանից:

Ուշագրավ է, որ yerkir.am-ի հետ զրույցում ոստիկանության հասարակայնության հետ կապերի և լրատվության բաժնի պետ Աշոտ Ահարոնյանն ասաց, որ ոստիկանապետի նորանշանակ խորհրդականը Հանրապետությունում է և իր գործառույթների մեջ է: Պարզվում է` առանց աշխատավայր գնալու էլ կարելի է «գործառույթների մեջ լինել» ու խորհուրդներ տալ ոստիկանապետին:

«Էդիկ Բարսեղյանն իր գործառույթների մեջ է, ախատանքը կարղ է լինել և' հիմնարկում, ե'ւ հիմնարկից դուրս: ՀՀ ոստիկանությունը ունի տարբեր ստորաբաժանումներ, հնարավոր է, որ ոստիկանության ծառայողները օրվա մեջ լինեն այլ ստորաբաժանումներում»,-բացատրեց Ահարոնյանը:

Հուսով ենք` նորանշանակ խորհրդականը երկուշաբթի օրվանից առաջին անգամ կմտնի իր աշխատասենյակ, իսկապես կկատարի իր գործառույթները, հակառակ դեպքում` առիթ կտա ենթադրելու, որ իր նոր պաշտոնն ընդամենը սիմվոլիկ բնույթ է կրում: