Աբել Աղանբեկյանը խորհուրդներ է տալիս

Ռուսաստանի գիտությունների ակադեմիայի ակադեմիկոս, Կորպորատիվ կառավարման բարձրագույն դպրոցի գիտական խորհրդի նախագահ Աբել Աղանբեկյանը եւ նույն դպրոցի տնօրենների խորհրդի նախագահ Ռադիկ Վանունցն Արցախում են. այսօր նրանց ընդունել է Արցախի նախագահ Բակո Սահակյանը:

Հանդիպման ընթացքում քննարկվել են հանրապետության ագրոարդյունաբերական համակարգի զարգացման հետ կապված հարցեր:

Աբել Աղանբեկյանն այսօր ԼՂՀ կառավարությունում հանդիպել է նաեւ հանրապետության գյուղատնտեսական ոլորտի մի խումբ պատասխանատու աշխատողների հետ եւ ներկայացրել իր նկատառումներն այդ բնագավառի հետագա զարգացման վերաբերյալ:

«Ելնելով իր կատարած ուսումնասիրություններից` ակադեմիկոս Ա. Աղանբեկյանը առաջնահերթորեն կարեւորել է անասնաբուծության ասպարեզում բարեփոխումներ կատարելու անհրաժեշտությունը: Նրա հիմնավորմամբ` հարկ է կազմակերպել կաթնապրանքնային խոշոր տնտեսություններ, ինչի շնորհիվ առաջիկա տարիներին մեծապես կաճի կաթի եւ մսի արտադրությունը: Գիտնականը լավ ներուժ է տեսնում նաեւ բուսաբուծության եւ ձկնաբուծության զարգացման համար: Բանախոսի փաստարկմամբ` անհրաժեշտ է բարեփոխել  հողային օրենսգիրքը` խստացնելով վարելահողերի մշակման  պահանջը»,- նշվում է կառավարության աշխատակազմի տեղեկատվության եւ հասարակայնության հետ կապերի վարչության տարածած հաղորդագրության մեջ: