Կանադայի խորհրդարանի անդամ Ստեֆան Դիոնի այցը Արցախ եւ Հայաստան

Ստեֆան Դիոն՝ (Stéphane Dion, ծն. 1955թ. սեպտեմբերի 28) կանադացի քաղաքական գործիչ: 1996 թվականից ի վեր Կանադայի խորհրդարանի անդամ է՝ ընտրված Մոնրեալի Սեն-Լորան-Կարտիեվիլ հայաշատ ընտրատարածքից։

2006-2008-ին Դիոնը եղել է Լիբերալ կուսակցության, ինչպես նաեւ պաշտոնական ընդդիմու­թյան ղեկավար խորհրդարանում։

Մինչեւ պատգամավոր ընտրվելը, որպես քաղաքական գիտությունների մասնագետ եւ սոցիո­լոգ, Ստեֆան Դիոնը եղել է ակադեմիական բնագավառի ճանաչված դեմք՝ Քվե­բե­կի անկախա­կան շարժման վերաբերյալ արտահայտած իր տեսակետներով։ Սկզբում եղել է Քվեբեկի անկա­խա­կան շարժման կողմնակից, իսկ հետագայում՝ կանադական ֆեդերալիզմի ջատագով։

1996-2003 թվականներին Ստեֆան Դիոնը եղել է Կանադայի Միջկառավարական հարցերի նախարար, 2004-2006 թվականներին՝ բնապահպանության:

Ստեֆան Դիոնը Կանադայի կողմից Հայոց ցեղասպանության ճանաչման ջատագովն է: Նա մշտապես օգնել է հայ համայնքին, ինչի համար էլ համայնքը նրան շնորհել է «Պատվավոր հայ» կոչումը։ Դիոնը աջակցել է 2002թ. հունիսի 13-ին Կանադայի խորհրդարանի վերին պալատի՝ Սենատի կողմից Հայոց ցեղասպանությունը ճանաչող բանաձեւի որդեգրմանը եւ կողմ քվեար­կել 2004թ. ապրիլի 21-ին խորհրդարանի ստորին՝ Համայնքների պալատի կողմից Հայոց ցեղասպանությունը ճանաչող բանաձեւին։

Ստեֆան Դիոնը կողմնակից է Հայաստանի Հանրապետությունում կանադական դեսպա­նա­տուն բացելու` հայ համայնքի տեսակետին։

Ստեֆան Դիոնի Հայաստանի Հանրապետություն եւ Արցախ այցելությունը կազմակերպել է Հայ Դատի Կանադայի հանձնախումբը, Կանադայուն ՀՀ դեսպանատան եւ ԼՂՀ ներկայա­ցուցչության հետ միասին։ Այցի նպա­տակն է`

ա) տեղում ծանոթանալ Արցախի իրականությանը,

բ) աջակցել հայ-կանադական հարաբե­րությունների սերտացմանը,

գ) ծանոթանալ ՀՀ-ում եւ Արցախում գտնվող սիրիահայերի խնդիրներին` դրանց լուծմանը Կանադայի աջակցությունն ապահովելու նպատակով։

Դիոնը Երեւան է ժամանել սեպտեմբերի 21-ի երեկոյան։ Սեպտեմբերի 22-ին, Հայ Դատի Կանադայի հանձնախմբի նախագահ Ժիրայր Բասմա­ջյանի ընկե­րակցությամբ, մեկնել է Արցախ։ Սեպտեմբերի 22-ին Կանադայի խորհրդարանի անդամ Ստեֆան Դիոնին ընդունել է ԼՂՀ Ազգային ժողովի նախագահ Աշոտ Ղուլյանը, սեպտեմբերի 23-ին ՝ Արցախի Հանրապետության նախա­գահ Բակո Սահակյանը:

Ստեֆան Դիոնը Հայաստանում կմնա մինչեւ սեպտեմբերի 27-ը եւ կունենա մի շարք հանդի­պումներ։