ՀՅԴ Հայ դատի Կանադայի գրասենյակը ողջունում է Ստեֆան Դիոնին Հայաստանում հատուկ պատվիրակ նշանակելու որոշումը

Գերմանիայում դեսպան և Եվրամիության ու Եվրոպայի հատուկ բանագնաց Ստեֆան Դիոնին Հայաստանում հատուկ բանագնաց է նշանակվել։ Այս մասին հայտնում է ՀՅԴ Հայ դատի Կանադայի գրասենյակը։

Հայտարարության մեջ ասում է՝ նշանակման նպատակն այն է, որ այս առաքելության արդյունքում ամրապնդվի Կանադայի հասարակության աջակցությունն ի շահ Հայաստանի ժողովրդավարության: Հատուկ բանագնացը կուսումնասիրի այն տարբերակները, որոնց միջոցով Կանադան կխթանի Հայաստանի քաղաքացիական հասարակության ջանքերը, կամրապնդի ժողովրդավարական կառույցները, կընդլայնի բազմակողմ կառույցների հետ Հայաստանի համագործակցությունը, ինչպես նաև կնպաստի տնտեսական աճին:

Ստեֆան Դիոնը կայցելի նաև Հայաստան ՀՀ կառավարության բարձրաստիճան ղեկավարների և առանցքային գերատեսչությունների, ինչպես նաև գործընկեր դեսպանությունների, քաղաքացիական հասարակական խմբերի, միջազգային կազմակերպությունների, մասնավոր հատվածի և տեղական լրատվամիջոցների  ներկայացուցիչների հետ հանդիպելու նպատակով:

Հատուկ բանագնացի առաքելությունը կտևի մի քանի ամիս, որը կներառի առցանց խորհրդակցություններ Կանադայում շահագրգիռ կողմերի և Հայաստանի գործընկերների մասնակցությամբ, հայտնում է աղբյուրը: