ԱՄՆ հույն քաղաքական գործիչները պահանջում են ճանաչել Ցեղասպանությունը

ԱՄՆ Կոնգրեսի ներկայացուցիչներ` ազգությամբ հույն  Մայքլ Բիլիրակիսը եւ Քարոլայն Մալոնին պաշտպանում են Հայոց ցեղասպանության ճանաչման եւ արդարադատության իրականացման օրինագիծը: Այս մասին հայտնում է ԱՄՆ Հայ Դատի հանձնախումբը:

«Մենք միանում ենք բոլոր ամերիկահայերին` ողջ երկրում սփռված, եւ Հունա-ամերիկյան կոալիցիային ու շնորհակալություն հայտնում կոնգրեսականներ Բիլիրակիսին եւ Մալոնիին` հայերի, հույների, ասորիների եւ այլ քրիստոնյաների հանդեպ իրականացված Ցեղասպանության միջազգային արդարացի ճանաչման գործին աջակցելու համար»,- ասել է ԱՄՆ Հայ Դատի գրասենյակի գործադիր տնօրեն Արամ Համբարյանը:

«Հույները, հայերը եւ բոլոր ԱՄՆ քաղաքացիները, ովքեր ձգտում են բարելավել ամերիկյան գաղափարները, սպասում են այն օրվան, թե երբ պետք է Սպիտակ տունը վերջապես ավարտի իր հանցակցությունը Անկարայի ժխտողական քաղաքականությանը եւ սկսի թուրքական հասարակությանը մղել դեպի սեփական` բարոյական եւ նյութական հանցանքի ճանաչմանը»,- հավելել է Համբարյանը:

Բիլիրակիսին եւ Մալոնիին միացել են նաեւ մի խումբ պաշտոնյաներ, ովքեր աշխատում են արտաքին քաղաքականության բնագավառում եւ շատ անգամ են աջակցել մարդու իրավունքներին առնչվող հարցերին: