Ադրբեջանցի քաղաքական գործիչները պահանջում են Արցախից դուրս բերել ռուս խաղաղապահներին

Ադրբեջանի քաղաքական կուսակցությունների և հասարակական կազմակերպությունների մի շարք ղեկավարներ, ինչպես նաև ադրբեջանական սփյուռքի ներկայացուցիչներ պահանջել են Արցախից դուրս բերել ռուսական խաղաղապահ ուժերը. հայտնում է «Թուրան» գործակալությունը։

Ադրբեջանցի քաղաքական և հասարակական գործիչները դիմել են ՄԱԿ-ին, ՄԱԿ-ի Անվտանգության խորհրդի, Եվրախորհրդարանի, ԵԽԽՎ-ի, ԵԱՀԿ-ի, Չմիավորման շարժման համակարգող բյուրոյի, ՆԱՏՕ-ի, ՆԱՏՕ-ի ԽՎ-ի, ՄԱԿ-ի փախստականների հարցերով գերագույն հանձնակատարի և ՅՈՒՆԵՍԿՕ-ի մշտական անդամներին:

Նրանք պնդում են, որ ռուսական խաղաղապահ առաքելության տեղակայումն Արցախում իրականացվել է միջազգային նորմերի խախտմամբ: Ըստ ադրբեջանցի քաղաքական գործիչների՝ Ռուսաստանը ստեղծել է ռազմական հենակետեր՝ իր ուժերը զինելով զենքով, որն  անհամատեղելի է խաղաղապահ գործունեության հետ: