Մեկը` Բեգլարյանի, մյուսը` Հռոմի պապի հրաժարականն է պահանջում

Մի քանի վարորդներ եւ նրանց շահերը ներկայացնող հասարակական կազմակերպության ներկայացուցիչներ այսօր ասուլիսի ժամանակ հայտարարեցին, որ պահանջում են ՀՀ տրանսպորտի եւ կապի նախարար Գագիկ Բեգլարյանի հրաժարականը։

«Այն կոլապսի համար, որում հայտնվել է տրանսպորտի ոլորտը` թե' հասարակական տրանսպորտի եւ թե' տաքսիների առումով, մենք գտնում ենք, որ պատասխանատվությունը կրում է տրանսպորտի նախարարությունը, հիմնական պատասխանատուն տրանսպորտի եւ կապի նախարար Գագիկ Բեգլարյանն է»,- հայտարարեց «Քաղաքացիական դիրքորոշում» հասարակական կազմակերպության նախագահ Գեւորգ Դոստուրյանը:

Ուշագրավ է, որ նա թեեւ Երեւանի քաղաքապետարանի, քաղաքապետարանի տրանսպորտի վարչության պետ Հենրիկ Նավասարդյանի մեղքի բաժինն էլ է տեսնում Երեւանում հասարարական տրանսպորտի հետ կապված խնդիրների մեջ, բայց, միեւնույն է, հիմնական մեղավոր համարում են տրանսպորտի նախարարին:

Դոստուրյանը տեղեկացրեց, որ հասարարական տրանսպորտն աշխատում է 2001թ.-ի հայեցակարգով: Համայնքները` լինի Երեւանը, թե Հայաստանի այլ քաղաք, ըստ նրա, կիրառում են կառավարության այս որոշումը: Լրագրողների դիտարկմանը, որ Երեւան քաղաքի հասարարական տրանսպորտի սակագնային քաղաքականությունը  տրանսպորտի եւ կապի նախարարությունը չի որոշում, անհասկանալի է Բեգլարյանի հրաժարականի պահանջը, ինչո՞ւ չեն պահանջում քաղաքապետ Տարոն Մարգարյանի հրաժարականը, Գեւորգ Դոստուրյանը եւս մեկ անգամ հայտարարեց, որ Տարոն Մարգարյանը ոչինչ անել չի կարող, եւ որ Երեւանի քաղաքապետարանն աշխատում է կառավարության 2001թ.-ի հաստատած հայեցակարգով:

Լրագրողների մեկ այլ դիտարկմանն էլ, թե 2001թ.-ին Բեգլարյանը նախարար չէր, կամ եթե կառավարությունն է հաստատել, գուցե պահանջեն վարչապետ Տիգրան Սարգսյանի հրաժարականը, ասուլիսի բանախոսները գրեթե նույն պատասխանն էին տալիս` մեղավորը Բեգլարյանն է:

«Վարչապետն ասել ա` ես ի՞նչ գործ ունեմ, շատ ճիշտ էլ ասել ա, ես ինչի՞ վարչապետի հրաժարականը պահանջեմ»,- հայտարարեց Դոստուրյանը:

«Ավտովարորդների պաշտպանություն» ՀԿ-ի նախագահ Տիգրան Հովհաննիսյանը եւս հայտարարեց, որ ստեղծված քաոսային իրավիճակի համար պատասխանատուն նախարարությունն է, որն առաջ քաշեց դեղին, սպիտակ համարանիշները, հիմա էլ տեսախցիկներ եւ կարմիր գծերն են ի հայտ եկել։ Թե ինչ կապ ունի տեսախցիկների եւ կարմիր գծերի հետ տրանսպորտի նախարարությունը, բանախոսները չհստակեցրեցին:

«Տարոն Մարգարյանն ընդհանրապես օրենք չի կարող փոխել, ամեն ինչի պատասխանատուն Գագիկ Բեգլարյանն է»,- եւս մեկ անգամ հայտարարեց Տիգրան Հովհաննիսյանը:

Լրագրողները Սպառողների միության նախագահ Արմեն Պողոսյանից հետաքրքրվեցին, թե արդյո՞ք արդարացված է ներքաղաքային տրանսպորտի համար պահանջել տրանսպորտի եւ կապի նախարարի հրաժարականը, ինքը ե՞ւս պահանջում է Բեգլարյանի հրաժարականը, Պողոսյանը հայտարարեց. «Ես Բեգլարյանի մասին չեմ խոսում, ես պահանջում եմ Հռոմի պապի հրաժարականը»: Նա էլ հայտարարեց, որ խնդիրների մեղավորը ճանապարհային ոստիկանությունն է, Երեւանի ավագանին: