Վարչապետը բարձր ջերմություն չունի, բայց շարունակում է բուժման կուրս ընդունել

a1plus.am-ը տեղեկացնում է, որ վարչապետ Տիգրան Սարգսյանն այսօր կրկին գնացել է «Նաիրի» բժշկական կենտրոն: Կայքի տեղեկություններով` նա բարձր ջերմություն ունի:

«Բժիշկները հետազոտում են նրան` ջերմության պատճառը պարզելու համար: Հիշեցնենք, որ վարչապետ Տիգրան Սարգսյանը վերջին օրերին պարբերաբար այցելում է բժշկական կենտրոն»,- գրել է լրատվամիջոցը:

Yerkir.am-ի հետ զրույցում վարչապետի մամուլի քարտուղար Հարություն Բերբերյանը տեղեկացրեց, որ Տիգրան Սարգսյանը շարունակում է բուժման կուրս ընդունել, եւ այսօր այցելել է «Նաիրի» բժշկական կենտրոն՝ հերթական բուժզննման:

Դիտարկմանը, թե ճի՞շտ է, որ Տիգրան Սարգսյանը բարձր ջերմություն ունի, եւ բժիշկները հետազոտում են նրան՝ ջերմության պատճառը պարզելու համար, Հարություն Բերբերյանը բացասական պատասխան տվեց:

Հիշեցնենք, որ վարչապետի մամուլի քարտուղարը դեռ երեք օր առաջ հաղորդագրություն էր տարածել` նշելով, թե վարչապետի մոտ հայտնաբերվել է սուր վիրուսային ինֆեկցիա: