Ծեծող ոստիկանը տկարամիտ է, մսագործ...

Արդեն հայտնել ենք,  որ այսօր առավոտից Խոշտանգումների զոհերի աջակցության միջազգային օրվա կապակցությամբ  մի շարք միջոցառումներ են կազմակերպել  «Քաղաքացիական հասարակության ինստիտուտ» (ՔՀԻ) և «Ընդդեմ իրավական կամայականության» (ԸԻԿ) հասարակական կազմակերպությունները:

Ակցիայի մասնակիցները, ովքեր կրում էին «Բացահայտեք և պատժեք խոշտանգողներին», «Կոչ ենք անում զերծ մնալ խոշտանգումներից»,  «Ծեծող ոստիկանը տկարամիտ է, մսագործ» և այլ գրություններով պաստառներ,  քայլերթով շարժվեցին ՀՀ ոստիկանություն, Կենտրոն-Նոր Նորք վարչական շրջանների ընդհանուր իրավասության դատարան, ՀՀ դատախազության, ապա ՀՀ հատուկ քննչական ծառայության և ՀՀ Վճռաբեկ դատարան: Միջոցառման մասնակիցների կարգախոսն էր «Հայաստանն առանց խոշտանգումների»:

Սակայն ոստիկաններն ակցիայի մասնակիցներին թույլ չտվեցին մոտենալ ոստիկանության գլխավոր շենքին` պատճառաբանելով, որ այդտեղ  ակցիա անել արգելվում է: Մասնակիցներից միայն երկուսին թույլ տվեցին մտնել շենք և նամակ հանձնել ոստիկանապետին:

Քաղաքացիական հասարակության ինստիտուտի ներկայացուցիչ Մերի Ալեքսանյանի խոսքով` ակցիայի  նպատակը  խոշտանգումների խնդիրը Հայաստանում ևս մեկ  անգամ բարձրաձայնելն է: «Մենք օրենսդրական փոփոխությունների հետ կապված` առաջարկություններ կներկայացնենք համապատասխան մարմիններին»,- yerkir.am-ի հետ զրույցում ասաց նա և հավելեց, որ այդ փոփոխությունները կնպաստեն Հայաստանում խոշտանգումների կանխարգելմանը:

Ըստ նրա` մեր երկրում խոշտանգումների հիմնական թիրախը  ոստիկանության բաժիններն են,  որտեղ երկար տարիներ հասարակական դիտորդական խմբերը մուտք գործելու իրավունք  չեն ունեցել և միայն վերջերս են  ՄԻՊ-ին  կից ստեղծված` խոշտանգումների ազգային կանխարգելման մեխանիզմի շրջանակներում գործող Խոշտանգումների կանխարգելման փորձագիտական խորհրդի անդամները թույլատվություն ստացել մուտք գործել ոստիկանության բաժիններ:

Նշենք նաև, որ ՀՀ քրեական օրենսգրքի  119-րդ հոդվածը, որը վերաբերում է խոշտանգումներին,  չի  համապատասխանում ՄԱԿ-ի կոնվենցիային: