Օպերայի եւ բալետի թատրոնը երկու պրեմիերա է խոստանում

Ալ. Սպենդիարյանի անվան օպերայի եւ բալետի ազգային ակադեմիական թատրոնն այս տարի նախատեսում է երկու պրեմիերա ունենալ. հանդիսատեսի դատին կներկայացվեն  Ժորժ Բիզեի «Կարմեն» եւ Պյոտր Չայկովսկու «Շչելկունչիկ» ստեղծագործությունները: Այս մասին այսօր լրագրողների հետ հանդիպման ժամանակ հայտարարեց օպերայի եւ բալետի ակադեմիական թատրոնի տնօրեն Կամո Հովհաննիսյանը:

Նա նշեց նաեւ, որ մայիսի 22-30-ը օպերայի սիմֆոնիկ նվագախումբը կմեկնի Օման, որտեղ նոր թատրոն են կառուցել:

«Մեր երաժիշտները երեք համերգ կունենան: Բացի դրանից` մայիսի 23-31-ը մեր բալետային խումբը կմեկնի Կատար` «Սպարտակը» ներկայացնելու»,- ասաց Հովհաննիսյանը:

Ըստ նրա` հունիսի 1-ին էլ Սանկտ Պետերբուրգի Մարիինյան թատրոնը կազմակերպել է հայ երաժիշտների համերգ, որին մասնակցում են թատրոնի 16 արտիստներ:

«Բոլոր երկրներն էլ սահմանափակել են հյուրախաղերի ցանկը, քանի որ ճգնաժամ է, սակայն մենք կաշխատենք հնարավորության սահմաններում մեկնել հյուրախաղերի»,- ասաց Հովհաննիսյանը: