Չեմ նայել այդ ″Անուշը″, բայց մոտավոր պատկերացնում եմ. Կամո Հովհաննիսյան

Ալ. Սպենդիարյանի անվան օպերայի եւ բալետի ազգային ակադեմիական թատրոնի տնօրեն Կամո Հովհաննիսյանն այսօր լրագրողների հետ հանդիպման ժամանակ նշեց, որ վերջերս մամուլում լուրեր են պտտվում, թե իրենց մոտ ամեն ինչ լուծվում է «վերեւների» մեկ զանգով, եւ ներկայացումից օրեր առաջ կարող են զանգով փոխել «Անուշի» դերակատարներից մեկին:

Ըստ Հովհաննիսյանի` լրագրողները հաճախ խառնում են ամեն ինչ, քանի որ 50-80 հազար դրամ աշխատավարձ ստացող նվիրյալները որտեղի՞ց կարող են «վերեւներում» ծանոթ ունենալ եւ նման հարցեր լուծել: «Մենք ժողովրդի մի մասն ենք: Չճշտված բանը չի կարելի գրել: Ուզո՞ւմ եք գրել ինչ-որ բանի մասին, մյուս «Անուշի» մասին գրեք, որում, ասում են, ծիծաղի առարկա են դարձրել Թումանյանին, սեքսուալ ազատություն են քարոզում: Ես չեմ նայել այդ «Անուշը», բայց մոտավոր պատկերացնում եմ»,- ասաց նա:

Ըստ Հովհաննիսյանի` եթե ներկայացումն, իրոք, անհաջող է եւ մեր ազգային արժեքները չի ներկայացնում, պետք է արգելել այն արտահանել:

Հարցին, թե որքանո՞վ է ճիշտ այդ հարցով դիմել ՀՀ նախագահին, նա պատասխանեց, որ ազգին չպախարակելու համար ամեն ճանապարհի էլ կարելի է դիմել: