Թումանյանի «Անուշը» Վանաձորի ՊԴԹ-ից մասնակցում է «Արտավազդ» մրցանակաբաշխության

2020 թ. մարտի 6-ին Վանաձորի Հովհաննես Աբելյանի անվան Պետական Դրամատիկական Թատրոնում  հանդիսականի դատին հանձնվեց  Հովհ. Թումանյանի «Անուշ»  պոեմի մոտիվներով բեմականացումը։  Ներկայացումը նվիրված էր Հովհ. Թումանյանի 150 ամյակին։ Այն ներկայացված է Հայաստանի թատերական գործիչների միության «Արտավազդ» ամենամյա մրցանակաբաշխությանը։ Ներկայացման բեմադրիչն է ՀՀ Ժողովրդական արտիստ Վահե Շահվերդյանը։

Մրցանակաբաշխության փորձագետների կազմում են՝ ՀՀ ԿԳՄՍ փոխնախարար Արա Խզմալյանը, դրամատուրգ, «Գրական թերթի» և «Դրամատուրգիա» ամսագրի գլխավոր խմբագիր Կարինե Խոդիկյանը, Երևանի մնջախաղի պետական թատրոնի գեղարվեստական ղեկավար Ժիրայր Դադասյանը, Գյումրու Վ․ Աճեմյանի անվան դրամատիկական թատրոնի տնօրեն, բեմադրիչ Լյուդվիգ Հարությունյանը, ԵԹԿՊԻ-ի թատերական ֆակուլտետի դեկան, պրոֆեսոր Աննա Հեքեքյանը, Երևանի կամերային թատրոնի տնօրեն, բեմադրիչ Լուսինե Երնջակյանը, թատերական և կինոբեմադրիչ Արամ Շահբազյանը: Տարիներ շարունակ «Արտավազդ» մրցանակաբաշխությունը խթանում է հայ թատերական մշակույթի զարգացմանը։

Հանդիսականի արձագանքը փաստեց, որ բեմադրիչին հաջողվել էր «Անուշը» ներկայացնել նորովի և միևնույն ժամանակ պահել Թումանյանական շունչը։

Վանաձորի թատրոնը մրցանակաբաշխությանն է ներկայացրել նաև «Վարազդատ» ներկայացումը։

                                                                Նյութը՝ Հրաչուհի Լոռեցյանի