Իմ մասին հոգ մի տարեք. Աշոտյանն` իր հետագա պաշտոնավարման մասին

Այսօր կառավարության նիստի ավարտից հետո լրագրողների հետ զրույցում կրթության եւ գիտության նախարարի ժամանակավոր պաշտոնակատար Արմեն Աշոտյանը կրկին անդրադարձավ իր պաշտոնանկության մասին լուրերին եւ տեղեկությանը, թե իբր Ֆրանսիայում Հայաստանի դեսպան է նշանակվելու:

«Երբ նման լուրեր առաջին անգամ շրջանառվեցին, ես մտածեցի` կատակ է, բայց երբ մամուլն անընդհատ գրում է, հավանաբար շատ է ցանկանում` ա. կա'մ ազատել կրթության եւ գիտության նախարարի պաշտոնն առավել սիրված մեկ այլ գործչի համար, բ. կա'մ էլ շատ է ցանկանում, որ ես իմ ֆրանսերենի իմացությունը կարողանամ դրսեւորել կամ ծառայեցնել ՀՀ արտաքին քաղաքականությանը»,- հայտարարեց Աշոտյանը:

Yerkir.am-ի դիտարկմանը` կամ էլ` այդ կրկնվող տեղեկատվության մեջ ճշմարտության, իրականության հատիկ կա, կրթության եւ գիտության նախարարի պաշտոնակատարը պատասխանեց. «Մնացել է 20 օր: Իրականում չեմ կարծում, որ բյուր հեռուստադիտողներ կամ ընթերցողներ այսօր կարիքն ունեն իրենց օրը լցնել իմ` հնարավոր աշխատանքի տեղավորման հարցերով: Իմ մասին շնորհակալ եմ, որ հոգ եք տանում, բայց մի տարեք»: