Չեմ կարծում, որ մեր մասով փոփոխություն լինի. Արծվիկ Մինասյանը` հետագա պաշտոնավարման մասին

Մի քանի օր պետք է սպասել` այդ լուրերը վերջնականապես հստակեցնելու համար. խորհրդարանում լրագրողների հետ զրույցում նշեց բնապահպանության նախարարի ժամանակավոր պաշտոնակատար Արծվիկ Մինասյանը` անդրադառնալով իր հետագա պաշտոնավարման հարցին:

«Չեմ կարծում, որ առնվազն մեր մասով /ՀՅԴ-խմբ./ կարող է փոփոխություն լինել, մանավանդ, որ կոալիցիոն համաձայնագրով և նախատեսված ծրագրով ունենք բավական մեծ անելիքներ»,- ասաց նա:

Անդրադառնալով Սերժ Սարգսյանի վարչապետության հարցին` Մինասյանը նշեց, որ, իր կարծիքով, ցանկացած երկրում հաղթած ուժի առաջնորդը ստանձնում է պատասխանատվություն:

Դիտարկմանը` հաղթած ուժի առաջնորդը հայտարարել է, որ չի հավակնում վարչապետի պաշտոնին, արձագանքեց, որ այդ հարցի պատասխանը Սերժ Սարգսյանն արդեն տվել է:

Դիտարկմանը` մամուլում հրապարակումներ են պարբերաբար եղել, որ Կարեն Կարապետյանը չի ցանկանում, որ նա ինքը նախարար, Մինասյանը պատասխանեց. «Պետք է սպասել նոր կառավարության վերջնական պատկերին: Ես աշխատել եմ կառավարությունում` ՀՀ նախագահ Սերժ Սարգսյանի գլխավորած երկրի պատասխանատվության ներքո: Համարում եմ, որ ամենաարդյունավետ աշխատանք կարող է իրականացվել»:

Հարցին`Կարեն Կարապետյանը չի՞ կարող ղեկավարել երկիրը վարչապետի պաշտոնում, նա պատասխանեց, որ գոյություն ունի շատ հստակ ընթացակարգ` ցանկացած երկրում գուցե արժանավորները լինեն շատ, բայց կուսակցության քաղաքական առաջնորդը մեկն է: «Հիմա երկրում կա հաղթած ուժի առաջնորդ, եւ համարում եմ, որ քաղաքական առաջնորդը պետք է ստանձնի թիվ մեկ պատասխանատվությունը»,- հավելեց Մինասյանը:

Տարածքային կառավարման և զարգացման նախարարի ԺՊ, դաշնակցական Դավիթ Լոքյանն էլ նշեց, որ պատրաստ է շարունակել իր աշխատանքը` որպես նախարար, բայց ավելացրեց, որ դեռ հարցը քննարկված չէ, և չգիտի` կշարունակի՞ պաշտոնավարել, թե՞ ոչ: