Մենք չենք հասկանում Հիսուսի հիշատակը մեկ րոպե լռությամբ հարգելը. Աղվան Վարդանյան

ՀՅԴ-ի համար դեռեւս հստակ չէ, թե ապրիլի 19-ին ինչ է նախատեսվում «Անի» հյուրանոցում. լրագրողների հետ հանդիպման ժամանակ հայտարարեց ԱԺ ՀՅԴ խմբակցության քարտուղար Աղվան Վարդանյանը` անդրադառնալով Րաֆֆի Հովհաննիսյանի` այդ օրը այդ վայրում միասնական ճակատ ստեղծելու առաջարկին:

Նա հայտարարեց, որ եթե նման հանդիպում են նախաձեռնել` կդիմեն բոլոր քաղաքական ուժերին եւ կասեն, թե ինչ հանդիպում է, ինչ է քննարկվելու, եւ կհրավիրեն: Եթե հրավեր լինի, ՀՅԴ-ն կմասնակցի: Վարդանյանը հիշեցրեց, որ ՀՅԴ-ն կարեւորում է այս շարժումը, բայց ՀՅԴ-ն ունի այլ մոտեցումներ:

«Կան բաներ, որ մենք չենք հասկանում: Մենք չենք հասկանում մեկ օրով Մոսկվա գնալը եւ հայ ժողովրդի հաղթանակն այնտեղից բերելը: Մենք չենք հասկանում ապրիլի 9-ին ոստիկանապետի հետ մոմավառությունը: Մենք չեն հասկանում ապրիլի 9-ին Հիսուսի հիշատակը մեկ րոպե լռությամբ հարգելը: Որքան մենք գիտենք Հիսուսը հարություն է առել: Բաներ կան, որ մեզ համար անսպասելի են, անկանխատեսելի, բայց շարժումն ինքնին շատ կարեւոր է, եւ մենք ամեն ինչ պետք է անենք, որ այն հզորանա»,- հայտարարեց նա: