ԱԳՆ-ում մոռացան Միգաշին հարցեր ուղղել

ՀՀ արտաքին գործերի նախարար Էդվարդ Նալբանդյանը երեկ ընդունել է Սերժ Սարգսյանի երդման արարողության առթիվ Երևան ժամանած` Սլովակիայի ԱԳՆ պատվիրակությանը, որի կազմում է եղել նաև Հայաստանում, Ադրբեջանում և ՌԴ-ում Սլովակիայի Հանրապետության դեսպան Յոզեֆ Միգաշը. գրում է «Ժողովուրդը»:

Թերթը գրում է, որ վերջինս, ի պատասխան ադրբեջանական հարցումների, հայտարարել էր, թե Սլովակիայում չկա Հայոց ցեղասպանության ժխտումը քրեականացնող օրենք: Այնինչ Եվրոպայի հայկական միությունների ֆորումի ղեկավար Աշոտ Գրիգորյանն այդ հայտարարություններից հետո նամակ էր ուղարկել Միգաշին՝ կից ներկայացնելով Սլովակիայի օրենսդրությունը, մասնավորապես՝ քր.օր. 424ա հոդվածը: Ավելին` Հայոց ցեղասպանության շուրջ Սլովակիայում 2004թ. ընդունվել է թիվ 1334 բանաձևը:

Իսկ ահա ՀՀ ԱԳՆ-ն բացարձակապես անուշադրության է մատնել այդ փաստը, որևէ անդրադարձ չի կատարել: Մինչդեռ, նշում է թերթը, ԱԳՆ-ին տարեկան 10 մլրդ 620 մլն դրամ է հատկացվում պետական բյուջեից, որի մեծ մասն ուղղվում է հենց դեսպանատներին: