Չեխիայի նախագահի նստավայրի տանիքին բարձրացվեց ԵՄ դրոշը

Չեխիայի նախագահի նստավայրի` Պրահայի ամրոցի տանիքին այսօր բարձրացվել է Եվրամիության դրոշը: Այսուհետ այն ծածանվելու է Չեխական Հանրապետության պետական դրոշի կողքին: Արարողությանը ներկա են եղել Չեխիայի նախագահ Միլոշ Զեմանը եւ Եվրահանձնաժողովի նախագահ Ժոզե Մանուել Բարոզուն. տեղեկացնում է ИТАР-ТАСС-ը:

ԵՄ դրոշը բարձրացնելու դեմ էր հանդես է գալիս Զեմանի նախորդը` Վացլավ Կլաուսը, սակայն մարտի 7-ին նրա լիազորությունների ժամկետը սպառվեց, եւ Զեմանն իր առաջին հրամաններից մեկով թույլատրեց Եվրամիության դրոշը բարձրացնել:

Արարողության ժամանակ Պրահայի ամրոցը փակ է եղել այցելուների համար, հարյուրավոր զբոսաշրջիկներ կատարվածին հետեւել են ցանկապատի մյուս կողմից: Այնտեղ են եղել նաեւ մի խումբ չեխեր, որոնք բողոքել են, որ ԵՄ դրոշը ծածանվի Չեխիայի թագավորների պալատի վրա: