Միևնույն է, Արցախի դրոշը տանելու ենք մեզ հետ. Արցախի դրոշը` «Եվրատեսիլ»-ի «արգելված» դրոշների ցանկում

«Եվրատեսիլ» երգի միջազգային մրցույթի կազմակերպիչները ներկայացրել են այս տարվա դրոշների «քաղաքականությունը», այսինքն` Եվրոպական հեռարձակողների միությունը ներկայացրել է, թե ինչ դրոշներ կարելի է բերել կամ չբերել դալիճ։ Արգելված դրոշների ցանկում է  նաև Արցախի դրոշը։

«Եվրատեսիլ»-ի հայաստանյան պատվիրակության ղեկավար Գոհար Գասպարյանը նշեց, որ, միևնույն է, իրենց հետ տանելու են Արցախի դրոշը:

«Բնականաբար, մենք տանելու ենք մեզ հետ Արցախի դրոշը: Ճիշտ է, մենք սրտնեղած ենք` սահմանին տիրող իրավիճակի հետ կապված, սակայն կարծում եմ, որ սա ևս մեկ հնարավորություն է, մեկ գաղափար, որի շուրջ կարող է համախմբվել ամբողջ հայությունը: Մենք խաղաղության կոչով ենք գնալու»,- ասաց Գասպարյանը:

Հիշեցնենք, որ մայիսի 10-ին, 12-ին, 14-ին Ստոկհոլմում կկայանա «Եվրատեսիլ-2016» երգի միջազգային մրցույթը: Մայիսի 1-ին հայաստանյան պատվիրակությունը կմեկնի Ստոկհոլմ: «Եվրատեսիլ»-ի այս տարվա հայաստանյան ներկայացուցիչը Իվետա Մուկուչյանն է, որը կներկայացնի LoveWave ստեղծագործությունը: