Գործատուն կպարտավորվի աշխատանքով ապահովել հաշմանդամներին

Մոտ օրերս ՀՀ կառավարությանը կներկայացվի «Հաշմանդամություն ունեցող անձանց իրավունքների պաշտպանության եւ սոցիալական ներառման մասին» ՀՀ օրենքի նախագիծը, որի խորհրդարանական լսումները տեղի ունեցան այսօր:

ՀՀ աշխատանքի եւ սոցիալական հարցերի նախարար Արտեմ Ասատրյանը լրագրողների հետ զրույցում նշեց, որ օրենքի նախագծով սահմանվում է, որ գործատուները աշխատանքով ապահովեն հաշմանդամություն ունեցող անձանց, հակառակ դեպքում` մասնահանումներ կլինեն, ինչը նշանակում է, որ եթե գործատուն ինչ-ինչ պատճառներով չի կարողանում աշխատանքով ապահովել հաշմանդամություն ունեցող անձին, ապա պարտավորվում է մասնահանում կատարել /գումար փոխանցել/, որպեսզի մյուս գործատուն կարողանա համապատասխան պայմաններ ստեղծել:

«Օրենքի դրական փոփոխություններից մեկն էլ այն է, որ սոցիալական պաշտպանությունը փոխակերպվում է սոցիալական ներառման: Տասնութ տարեկանից բարձր անձանց համար հիմնական խնդիրը լինելու է պահպանված աշխատունակության սահմանումը, քանի որ ինտերգրվելու ամենակարեւոր ձեւը զբաղվածության ապահովումն է: Գնահատելով յուրաքանչյուր անձի սոցիալական կարիքները` կձեւավորվեն վերականգնողական անհատական ծրագրեր»,- ասաց նախարարը:

Ըստ նրա` հաշմանդամություն ունեցող անձանց համար կարեւոր է նաեւ միջավայրի հարմարեցումը եւ, ի տարբերություն գործող օրենքի, նոր օրենքով նախատեսվում է համապատասխան մեխանիզմների ամրագրում, որը թույլ կտա քայլ-քայլ իրականացնել այդ դրույթները եւ հասնել նաեւ աշխատատեղերի հարմարեցման: